soz-e-gham se jigar jal raha hai magar mera dard-e-nihan aashkara nahin

soz-e-ġham se jigar jal rahā hai magar mirā dard-e-nihāñ āshkārā nahīñ

ghuT ke marnā gavārā hai ai chāra-gar rāz-e-ulfat ayaañ ho gavārā nahīñ

sham.a jaltī rahī raat Dhaltī rahī nabz-e-bīmār ruk ruk ke chaltī rahī

aa ke dam bhar ke mehmāñ ko ab dekh lo is ke bachne kā koī sahārā nahīñ

bach ke tūfāñ kī zad se kahāñ jā.egā ab kahāñ tak talātum se Takrā.egā

is safīne ko ab Duub jaane bhī do jis kī qismat meñ koī kinārā nahīñ

hai chaman to vahī vo nasheman kahāñ chand tinkoñ kī ḳhātir chaleñ āñdhiyāñ

ab vo jhoñke nahīñ ab vo tūfān nahīñ ab vo sho.ale nahīñ vo sharārā nahīñ

ḳhār-o-gul meñ hai bāham ye paikār kyā ye jafā-o-vafā meñ hai takrār kyā

dil kī baazī meñ hai jiit kyā haar kyā husn jiitā nahīñ ishq haarā nahīñ

jis se bazm-e-vafā meñ charāġhāñ na ho dil kī vīrān bastī gulistāñ na ho

ye tabassum to koī tabassum nahīñ ye ishārā to koī ishārā nahīñ

dil se bigḌī ḳhirad se ḳhafā ho gayā dīn-o-duniyā se nā-āshnā ho gayā

baiThe baiThe 'vafā' ko ye kyā ho gayā ab tumhārā karam bhī gavārā nahīñ

soz-e-gham se jigar jal raha hai magar mera dard-e-nihan aashkara nahin

ghuT ke marna gawara hai ai chaara-gar raaz-e-ulfat ayan ho gawara nahin

shama jalti rahi raat Dhalti rahi nabz-e-bimar ruk ruk ke chalti rahi

aa ke dam bhar ke mehman ko ab dekh lo is ke bachne ka koi sahaara nahin

bach ke tufan ki zad se kahan jaega ab kahan tak talatum se Takraega

is safine ko ab Dub jaane bhi do jis ki qismat mein koi kinara nahin

hai chaman to wahi wo nasheman kahan chand tinkon ki KHatir chalen aandhiyan

ab wo jhonke nahin ab wo tufan nahin ab wo shoale nahin wo sharara nahin

KHar-o-gul mein hai baham ye paikar kya ye jafa-o-wafa mein hai takrar kya

dil ki bazi mein hai jit kya haar kya husn jita nahin ishq haara nahin

jis se bazm-e-wafa mein charaghan na ho dil ki viran basti gulistan na ho

ye tabassum to koi tabassum nahin ye ishaara to koi ishaara nahin

dil se bigDi KHirad se KHafa ho gaya din-o-duniya se na-ashna ho gaya

baiThe baiThe 'wafa' ko ye kya ho gaya ab tumhaara karam bhi gawara nahin