soz hai dil ke dagh mein ab tak

soz hai dil ke daaġh meñ ab tak

raushnī hai charāġh meñ ab tak

zulf-e-mushkīñ thī mehrbāñ kis kī

bū basī hai dimāġh meñ ab tak

tishna-kāmoñ ko is se kyā hāsil

mai dharī hai ayāġh meñ ab tak

haa.e āvārgī-e-bād-e-sabā

hai ye kis ke surāġh meñ ab tak

go ḳhizāñ kā bhī daur-daura hai

phuul khilte haiñ baaġh meñ ab tak

roz-o-shab maare maare phirte haiñ

ham talāsh-e-farāġh meñ ab tak

ye bhī bujh jā.egī kabhī 'najmī'

raushnī hai charāġh meñ ab tak

soz hai dil ke dagh mein ab tak

raushni hai charagh mein ab tak

zulf-e-mushkin thi mehrban kis ki

bu basi hai dimagh mein ab tak

tishna-kaamon ko is se kya hasil

mai dhari hai ayagh mein ab tak

hae aawargi-e-baad-e-saba

hai ye kis ke suragh mein ab tak

go KHizan ka bhi daur-daura hai

phul khilte hain bagh mein ab tak

roz-o-shab mare mare phirte hain

hum talash-e-faragh mein ab tak

ye bhi bujh jaegi kabhi 'najmi'

raushni hai charagh mein ab tak