soz se saz kiya chahiye ab

soz se saaz kiyā chāhiye ab

nai se āvāz kiyā chāhiye ab

khā ke tīr-e-nigah-e-nāz us ko

qadr-andāz kiyā chāhiye ab

jis meñ jī jism meñ aa.e ai jaañ

haañ vo ejaaz kiyā chāhiye ab

dil meñ aatā hai tire ġham ko yaar

mahram-e-rāz kiyā chāhiye ab

kaan tak us ke to pahuñche yakbār

aisī āvāz kiyā chāhiye ab

husn kā vasf tire sūrat-e-ḳhat

ḳhāma-parvāz kiyā chāhiye ab

roġhan-e-qāz male vasf-e-nāz

taaza pardāz kiyā chāhiye ab

tā na ho tā.ir-e-jāñ said kahīñ

chashm-e-dil-bāz kiyā chāhiye ab

tā.ir-e-fikr ko sustī se 'vaqār'

tez parvāz kiyā chāhiye ab

soz se saz kiya chahiye ab

nai se aawaz kiya chahiye ab

kha ke tir-e-nigah-e-naz us ko

qadr-andaz kiya chahiye ab

jis mein ji jism mein aae ai jaan

han wo ejaz kiya chahiye ab

dil mein aata hai tere gham ko yar

mahram-e-raaz kiya chahiye ab

kan tak us ke to pahunche yakbar

aisi aawaz kiya chahiye ab

husn ka wasf tere surat-e-KHat

KHama-parwaz kiya chahiye ab

roghan-e-qaz male wasf-e-naz

taza pardaz kiya chahiye ab

ta na ho tair-e-jaan said kahin

chashm-e-dil-baz kiya chahiye ab

tair-e-fikr ko susti se 'waqar'

tez parwaz kiya chahiye ab