subh bhi hoti rahi mahtab bhi Dhalta raha

sub.h bhī hotī rahī mahtāb bhī Dhaltā rahā

zindagī kā kārvāñ chaltā rahā chaltā rahā

sāneha kyā us pe guzrā kaun uTh kar dekhtā

ahl-e-ḳhāna so ga.e lekin diyā jaltā rahā

mere ḳhvāboñ kī koī buniyād bhī thī kyā kahūñ

barf kā parbat thā ik galtā rahā galtā rahā

āḳhirī vaqt aa gayā to sochtā huuñ dosto

aaj kā jo mas.ala thā kal pe kyuuñ Taltā rahā

sāmne ke dushmanoñ se bach ke rahnā sahl thā

āstīñ kā saañp thā baḌhtā rahā paltā rahā

hādse kī vo kahānī muḳhtasar sī hai 'shakīl'

bāñsurī bhī baj rahī thī shahr bhī jaltā rahā

subh bhi hoti rahi mahtab bhi Dhalta raha

zindagi ka karwan chalta raha chalta raha

saneha kya us pe guzra kaun uTh kar dekhta

ahl-e-KHana so gae lekin diya jalta raha

mere KHwabon ki koi buniyaad bhi thi kya kahun

barf ka parbat tha ek galta raha galta raha

aaKHiri waqt aa gaya to sochta hun dosto

aaj ka jo masala tha kal pe kyun Talta raha

samne ke dushmanon se bach ke rahna sahl tha

aastin ka sanp tha baDhta raha palta raha

hadse ki wo kahani muKHtasar si hai 'shakil'

bansuri bhi baj rahi thi shahr bhi jalta raha