subh-e-gulshan mein ho gar wo gul-e-KHandan paida

sub.h-e-gulshan meñ ho gar vo gul-e-ḳhandāñ paidā

baiza-e-ġhuncha se ho bulbul-e-nālāñ paidā

ashk hai ham-rah-e-āh-e-dil-e-sozāñ paidā

kyā tamāshā hai ki ātish se hai bārāñ paidā

hai ajab kaar numāyāñ tire chashm o lab se

pal meñ mar jaate haiñ ham dam meñ haiñ phir haañ paidā

qad tirā ai but-e-gul-posh ho gar sāya-fagan

to qayāmat ho sar-e-ḳhāk-e-shahīdāñ paidā

le uḌā baad ke mānind pa paanī saaqī

kashtī-e-mai huī juuñ taḳht-e-sulaimāñ paidā

huuñ vo majnūñ ki kare hai mirī pā-bosī ko

silsila halqa-e-chashmān-e-ġhazālāñ paidā

hañs ke dandāñ ko dikhā do to na shabnam se sahar

dahan-e-ġhuncha kare baaġh meñ dandāñ paidā

zulf o ḳhat dekh tire ruḳh pe na kyuuñ hairāñ hoñ

chashma-e-mahr meñ haiñ sumbul-o-raihāñ paidā

kyā ġhazab hai ye tire dāman-e-mizhgāñ kī jhapak

ishq ke dil se huī ātish-e-pinhāñ paidā

tujh ko duuñ huur se nisbat to ye merā hai qusūr

ki jahāñ meñ nahīñ tujh sā koī insāñ paidā

terī ḳhidmat ko paristāñ meñ banī haiñ pariyāñ

aur ġhulāmī ke liye haiñ tirī ġhilmāñ paidā

ye tire zer-e-zaqan dast-e-hinā.ī hai kahāñ

seb-e-jannat se hai sar-panja-e-marjāñ paidā

Turfa-tar likh ġhazal is bahr meñ ik aur 'nasīr'

karte haiñ gauhar-e-ma.anī ko suḳhan-dāñ paidā

subh-e-gulshan mein ho gar wo gul-e-KHandan paida

baiza-e-ghuncha se ho bulbul-e-nalan paida

ashk hai ham-rah-e-ah-e-dil-e-sozan paida

kya tamasha hai ki aatish se hai baran paida

hai ajab kar numayan tere chashm o lab se

pal mein mar jate hain hum dam mein hain phir han paida

qad tera ai but-e-gul-posh ho gar saya-fagan

to qayamat ho sar-e-KHak-e-shahidan paida

le uDa baad ke manind pa pani saqi

kashti-e-mai hui jun taKHt-e-sulaiman paida

hun wo majnun ki kare hai meri pa-bosi ko

silsila halqa-e-chashman-e-ghazalan paida

hans ke dandan ko dikha do to na shabnam se sahar

dahan-e-ghuncha kare bagh mein dandan paida

zulf o KHat dekh tere ruKH pe na kyun hairan hon

chashma-e-mahr mein hain sumbul-o-raihan paida

kya ghazab hai ye tere daman-e-mizhgan ki jhapak

ishq ke dil se hui aatish-e-pinhan paida

tujh ko dun hur se nisbat to ye mera hai qusur

ki jahan mein nahin tujh sa koi insan paida

teri KHidmat ko paristan mein bani hain pariyan

aur ghulami ke liye hain teri ghilman paida

ye tere zer-e-zaqan dast-e-hinai hai kahan

seb-e-jannat se hai sar-panja-e-marjaan paida

Turfa-tar likh ghazal is bahr mein ek aur 'nasir'

karte hain gauhar-e-mani ko suKHan-dan paida