subh ka dhoka hua hai sham par

sub.h kā dhokā huā hai shaam par

chāñd ko dekhā achānak baam par

juz mire sūraj parinde aadmī

sab nikal jaate haiñ apne kaam par

bāryābī ke liye jaa.eñ magar

dil ThiThak jaatā hai pahle gaam par

par lage ḳhushbū ko tere zikr se

muskurā.e phuul tere naam par

be-zarūrat ghar se nikleñ aur phir

shai ḳharīdeñ koī mahñge daam par

ḳhāmushī achchhī hai lekin is qadar

kuchh to boleñ aap is kohrām par

ai junūñ ye jī meñ aatā hai kabhī

vaqf kar deñ ḳhud ko tere naam par

aañkh meñ 'fārūq' aañsū aa ga.e

kyā fasāna aa gayā anjām par

subh ka dhoka hua hai sham par

chand ko dekha achanak baam par

juz mere suraj parinde aadmi

sab nikal jate hain apne kaam par

baryabi ke liye jaen magar

dil ThiThak jata hai pahle gam par

par lage KHushbu ko tere zikr se

muskurae phul tere nam par

be-zarurat ghar se niklen aur phir

shai KHariden koi mahnge dam par

KHamushi achchhi hai lekin is qadar

kuchh to bolen aap is kohram par

ai junun ye ji mein aata hai kabhi

waqf kar den KHud ko tere nam par

aankh mein 'faruq' aansu aa gae

kya fasana aa gaya anjam par