subh ko aae ho nikle sham ke

sub.h ko aa.e ho nikle shaam ke

jaao bhī ab tum mire kis kaam ke

hāthā-pā.ī se yahī matlab bhī thā

koī muñh chūme kalā.ī thaam ke

tum agar chāho to kuchh mushkil nahīñ

Dhang sau haiñ nāma-o-paiġhām ke

chheḌ vā'iz har ghaḌī achchhī nahīñ

rind bhī haiñ ek apne naam ke

qahr Dhā.egī asīroñ kī taḌap

aur bhī uljheñge halqe daam ke

mohtasib chun lene de ik ik mujhe

dil ke TukḌe haiñ ye TukḌe jaam ke

lākhoñ dhaḌke ibtidā-e-ishq meñ

dhyān haiñ āġhāz meñ anjām ke

mai kā fatvā to sahī qaazī se luuñ

Tok kar raste meñ dāman thaam ke

duur daur-e-mohtasib hai āj-kal

ab kahāñ vo daur-daure jaam ke

naam jab us kā zabāñ par aa gayā

rah gayā nāseh kalejā thaam ke

duur se naale mire sun kar kahā

aa ga.e dushman mire ārām ke

haa.e vo ab pyaar kī bāteñ kahāñ

ab to laale haiñ mujhe dushnām ke

vo lagā.eñ qahqahe sun kar 'hafīz'

aap naale kījiye dil thaam ke

subh ko aae ho nikle sham ke

jao bhi ab tum mere kis kaam ke

hatha-pai se yahi matlab bhi tha

koi munh chume kalai tham ke

tum agar chaho to kuchh mushkil nahin

Dhang sau hain nama-o-paigham ke

chheD wa'iz har ghaDi achchhi nahin

rind bhi hain ek apne nam ke

qahr Dhaegi asiron ki taDap

aur bhi uljhenge halqe dam ke

mohtasib chun lene de ek ek mujhe

dil ke TukDe hain ye TukDe jam ke

lakhon dhaDke ibtida-e-ishq mein

dhyan hain aaghaz mein anjam ke

mai ka fatwa to sahi qazi se lun

Tok kar raste mein daman tham ke

dur daur-e-mohtasib hai aaj-kal

ab kahan wo daur-daure jam ke

nam jab us ka zaban par aa gaya

rah gaya naseh kaleja tham ke

dur se nale mere sun kar kaha

aa gae dushman mere aaram ke

hae wo ab pyar ki baaten kahan

ab to lale hain mujhe dushnam ke

wo lagaen qahqahe sun kar 'hafiz'

aap nale kijiye dil tham ke