subh talak aflak pe ek kaifiyyat tari karta hun

sub.h talak aflāk pe ik kaifiyyat taarī kartā huuñ

chāñd ko apnī nazm sunā kar shab-bedārī kartā huuñ

chaukīdār huuñ lekin merā lambā-chauḌā kaam nahīñ

ek hī phuul hai baaġh meñ jis kī pahre-dārī kartā huuñ

ghar se nikal aatā huuñ aksar subah ke taḌke vahshat meñ

jhiil meñ patthar pheñk ke din-bhar vaqt-guzārī kartā huuñ

raat guzar jaatī hai merī hijr kā dukh nimTāne meñ

zaḳhm-shumārī ho jaa.e to najm-shumārī kartā huuñ

ḳhuun se khīñch ke ashk ko apne laatā huuñ in āñkhoñ tak

kitnī mushkil se maiñ ḳhud par riqqat taarī kartā huuñ

tum ko samajh meñ aa jaa.e to samjho sher mukammal hai

TūTe-phūTe lafzoñ meñ bas baat tumhārī kartā huuñ

lafzoñ ko tartīb meñ rakh kar paḌhtā huuñ har mahfil meñ

lahje kī imdād se maiñ āvāz ko bhārī kartā huuñ

roz birājnā hotā hai ik nayā singhāsan mujh ko 'zeb'

roz ke roz isī dhārā ke sikke jaarī kartā huuñ

subh talak aflak pe ek kaifiyyat tari karta hun

chand ko apni nazm suna kar shab-bedari karta hun

chaukidar hun lekin mera lamba-chauDa kaam nahin

ek hi phul hai bagh mein jis ki pahre-dari karta hun

ghar se nikal aata hun aksar subah ke taDke wahshat mein

jhil mein patthar phenk ke din-bhar waqt-guzari karta hun

raat guzar jati hai meri hijr ka dukh nimTane mein

zaKHm-shumari ho jae to najm-shumari karta hun

KHun se khinch ke ashk ko apne lata hun in aankhon tak

kitni mushkil se main KHud par riqqat tari karta hun

tum ko samajh mein aa jae to samjho sher mukammal hai

TuTe-phuTe lafzon mein bas baat tumhaari karta hun

lafzon ko tartib mein rakh kar paDhta hun har mahfil mein

lahje ki imdad se main aawaz ko bhaari karta hun

roz birajna hota hai ek naya singhasan mujh ko 'zeb'

roz ke roz isi dhaara ke sikke jari karta hun