subu par jam par shishe pe paimane pe kya guzri

subū par jaam par shīshe pe paimāne pe kyā guzrī

na jaane maiñ ne tauba kī to mai-ḳhāne pe kyā guzrī

mileñ to fā.izān-e-manzil-e-maqsūd se pūchhūñ

guzargāh-e-mohabbat se guzar jaane pe kyā guzrī

kisī ko mere kāshāne se hamdardī nahīñ shāyad

har ik ye pūchhtā hai mere kāshāne pe kyā guzrī

na ho jo zindagī anjām vo vijdān-e-nāqis hai

huzūr-e-sham' bā'd-e-vajd parvāne pe kyā guzrī

batā.eñ barhaman aur shaiḳh un kī ḳhāna-jañgī meñ

ḳhudā-ḳhāne pe kyā biitī sanam-ḳhāne pe kyā guzrī

tū apne hī ma.āl-e-soz-e-ġham par ġhaur kar pahle

tujhe is se nahīñ kuchh bahas parvāne pe kyā guzrī

kisī hikmat se kar de koī goyā marne vāloñ ko

ye raaz ab tak hai sar-basta ki mar jaane pe kyā guzrī

tirī har sū tajallī aur merī har taraf nazreñ

tujhe to yaad hogā ā.īna-ḳhāne pe kyā guzrī

zabāñ muñh meñ hai 'arz-e-hāl kar tū ne to dekhā hai

ki ḳhū-e-zabt-o-ḳhāmoshī se parvāne pe kyā guzrī

vo kahtā thā ḳhudā jaane bahār aa.e to kyā guzre

ḳhudā jaane bahār aa.ī to dīvāne pe kyā guzrī

ye hai 'sīmāb' ik nā-gufta ba-afsāna kyā kahiye

vatan se kunj-e-ġhurbat meñ chale aane pe kyā guzrī

subu par jam par shishe pe paimane pe kya guzri

na jaane main ne tauba ki to mai-KHane pe kya guzri

milen to faizan-e-manzil-e-maqsud se puchhun

guzargah-e-mohabbat se guzar jaane pe kya guzri

kisi ko mere kashane se hamdardi nahin shayad

har ek ye puchhta hai mere kashane pe kya guzri

na ho jo zindagi anjam wo wijdan-e-naqis hai

huzur-e-sham' ba'd-e-wajd parwane pe kya guzri

bataen barhaman aur shaiKH un ki KHana-jangi mein

KHuda-KHane pe kya biti sanam-KHane pe kya guzri

tu apne hi maal-e-soz-e-gham par ghaur kar pahle

tujhe is se nahin kuchh bahas parwane pe kya guzri

kisi hikmat se kar de koi goya marne walon ko

ye raaz ab tak hai sar-basta ki mar jaane pe kya guzri

teri har su tajalli aur meri har taraf nazren

tujhe to yaad hoga aaina-KHane pe kya guzri

zaban munh mein hai 'arz-e-haal kar tu ne to dekha hai

ki KHu-e-zabt-o-KHamoshi se parwane pe kya guzri

wo kahta tha KHuda jaane bahaar aae to kya guzre

KHuda jaane bahaar aai to diwane pe kya guzri

ye hai 'simab' ek na-gufta ba-afsana kya kahiye

watan se kunj-e-ghurbat mein chale aane pe kya guzri