subu uTha ki faza sim-e-KHam hai saqi

subū uThā ki fazā sīm-e-ḳhām hai saaqī

farāz-e-koh pe māh-e-tamām hai saaqī

chune hue haiñ piyāle jhukī huī botal

nayā qu.uud nirālā qayām hai saaqī

ba-nāz-e-muġhbachagān o ba-faiz-e-nāra-e-hū

humā-e-arz-o-samā zer-e-dām hai saaqī

fazā pe nahr-e-pur-afshān-e-tāb huur o tuhūr

ġhinā meñ shahr-e-qasūr-o-ḳhayām hai saaqī

ye kaun shāhid-e-mastī-farosh o naġhma-navāz

nafas ke taar pe garm-e-ḳhirām hai saaqī

na ism o jism na harf o nafas na saaya o naql

ye kyā tilism ye kaisā maqām hai saaqī

ruke na daur ki ab tak ba-zer-e-charḳh-e-kabūd

riyā halāl hai sahbā harām hai saaqī

ba-nām-e-ādam-o-havvā pilā ki garm-e-surūd

nasīm-e-roza-e-dārus-salām hai saaqī

subū-e-qila-shikan kī sipar ināyat kar

ki teġh-e-daur-e-zamāñ be-niyām hai saaqī

agar ġhizā-e-ḳhayāl-o-nazar se hai mahrūm

hayāt-e-zehn kā māh-e-siyām hai saaqī

tamām daulat-e-duniya-o-dīñ pe bhārī hai

vo dil jo basta-e-hubb-e-anām hai saaqī

ajab nahīñ ki tujhe bhī pasand aa.e ye qaul

jhuke na dil to ibādat harām hai saaqī

sifāt o zaat ke aivān-e-rūh-parvar tak

subū se fāsala-e-nīm-gām hai saaqī

subu uTha ki faza sim-e-KHam hai saqi

faraaz-e-koh pe mah-e-tamam hai saqi

chune hue hain piyale jhuki hui botal

naya quud nirala qayam hai saqi

ba-naz-e-mughbachagan o ba-faiz-e-nara-e-hu

huma-e-arz-o-sama zer-e-dam hai saqi

faza pe nahr-e-pur-afshan-e-tab hur o tuhur

ghina mein shahr-e-qasur-o-KHayam hai saqi

ye kaun shahid-e-masti-farosh o naghma-nawaz

nafas ke tar pe garm-e-KHiram hai saqi

na ism o jism na harf o nafas na saya o naql

ye kya tilism ye kaisa maqam hai saqi

ruke na daur ki ab tak ba-zer-e-charKH-e-kabud

riya halal hai sahba haram hai saqi

ba-nam-e-adam-o-hawwa pila ki garm-e-surud

nasim-e-roza-e-darus-salam hai saqi

subu-e-qila-shikan ki sipar inayat kar

ki tegh-e-daur-e-zaman be-niyam hai saqi

agar ghiza-e-KHayal-o-nazar se hai mahrum

hayat-e-zehn ka mah-e-siyam hai saqi

tamam daulat-e-duniya-o-din pe bhaari hai

wo dil jo basta-e-hubb-e-anam hai saqi

ajab nahin ki tujhe bhi pasand aae ye qaul

jhuke na dil to ibaadat haram hai saqi

sifat o zat ke aiwan-e-ruh-parwar tak

subu se fasala-e-nim-gam hai saqi