sukun-e-dil ki KHatir ek sahaara DhunDte hain

sukūn-e-dil kī ḳhātir ik sahārā DhūñDte haiñ

jo gardish meñ nahīñ hai vo sitārā DhūñDte haiñ

abhī to tujh se vābasta haiñ pichhle zaḳhm saare

shab-e-rafta tujhe ham kyuuñ dobārā DhūñDte haiñ

koī ghar hī nahīñ to be-gharī kā zaḳhm kaisā

sukūnat ke liye ik isti.ārā DhūñDte haiñ

zamīñ achchhī lagī hai āsmāñ par jā ke ham ko

kahāñ hai is zamīñ par ghar hamārā DhūñDte haiñ

ye dariyā zindagī kā paar kaise ho ki jab ham

kināre par khaḌe haiñ aur kināra DhūñDte haiñ

hamārī ḳhvāhish-e-be-ḳhvāhishī jo raakh kar de

ham apnī shaḳhsiyat meñ vo sharāra DhūñDte haiñ

kisī mahtāb ko qadmoñ meñ le aane se pahle

ham un āñkhoñ kā halkā sā ishāra DhūñDte haiñ

sukun-e-dil ki KHatir ek sahaara DhunDte hain

jo gardish mein nahin hai wo sitara DhunDte hain

abhi to tujh se wabasta hain pichhle zaKHm sare

shab-e-rafta tujhe hum kyun dobara DhunDte hain

koi ghar hi nahin to be-ghari ka zaKHm kaisa

sukunat ke liye ek istiara DhunDte hain

zamin achchhi lagi hai aasman par ja ke hum ko

kahan hai is zamin par ghar hamara DhunDte hain

ye dariya zindagi ka par kaise ho ki jab hum

kinare par khaDe hain aur kinara DhunDte hain

hamari KHwahish-e-be-KHwahishi jo rakh kar de

hum apni shaKHsiyat mein wo sharara DhunDte hain

kisi mahtab ko qadmon mein le aane se pahle

hum un aankhon ka halka sa ishaara DhunDte hain