sukun-e-qalb hai dhaDkan ki intiha hai ghazal

sukūn-e-qalb hai dhaḌkan kī intihā hai ġhazal

vaqār-e-zīst hai sāñsoñ kā silsila hai ġhazal

kalī kī nāzukī phūloñ kī har adā hai ġhazal

dulhan kī sharm-o-hayā surḳhī-e-hinā hai ġhazal

zamāne bhar kī to har shai se āshnā hai ġhazal

tamām lafz tire dil kā aa.ina hai ġhazal

kabhī machalte laboñ kī sī nāzukī to kabhī

dahaktī ret pe Thahrī huī navā hai ġhazal

na.ī hayāt ke pahlū ko dastakeñ detī

libās-e-rūh meñ utrī huī sadā hai ġhazal

añdherī raat meñ ummīd kī kiran jaisī

kisī ġharīb kī ḳhushiyoñ kī ibtidā hai ġhazal

nigār-e-husn hai ye husn-e-kā.enāt bhī hai

isī liye to hamesha se ḳhushnumā hai ġhazal

dupaTTā khīñch liyā us kā jis ne jab chāhā

suḳhan kī laaj hai phir bhī to be-ridā hai ġhazal

'zahīn' is kā asar be-asar nahīñ hotā

kisī faqīr kī māñgī huī duā hai ġhazal

sukun-e-qalb hai dhaDkan ki intiha hai ghazal

waqar-e-zist hai sanson ka silsila hai ghazal

kali ki nazuki phulon ki har ada hai ghazal

dulhan ki sharm-o-haya surKHi-e-hina hai ghazal

zamane bhar ki to har shai se aashna hai ghazal

tamam lafz tere dil ka aaina hai ghazal

kabhi machalte labon ki si nazuki to kabhi

dahakti ret pe Thahri hui nawa hai ghazal

nai hayat ke pahlu ko dastaken deti

libas-e-ruh mein utri hui sada hai ghazal

andheri raat mein ummid ki kiran jaisi

kisi gharib ki KHushiyon ki ibtida hai ghazal

nigar-e-husn hai ye husn-e-kaenat bhi hai

isi liye to hamesha se KHushnuma hai ghazal

dupaTTa khinch liya us ka jis ne jab chaha

suKHan ki laj hai phir bhi to be-rida hai ghazal

'zahin' is ka asar be-asar nahin hota

kisi faqir ki mangi hui dua hai ghazal