sukun nasib hua aur na kuchh qarar mujhe

sukūñ nasīb huā aur na kuchh qarār mujhe

ḳhizāñ hī lagtā hai ye mausam-e-bahār mujhe

vo aa.eñ bazm-e-tasavvur meñ bas ye kaafī hai

qasam ḳhudā kī yahī hai visāl-e-yār mujhe

ye be-ḳhudī bhī mohabbat kī ik amānat hai

ḳhudā ke vāste kiije na hoshiyār mujhe

samajh sake na mire ġham ko aap bhī ab tak

yahī hai ġham jo rulātā hai zaar zaar mujhe

ye jāntā huuñ ki manzil qarīb hai lekin

dikhā.ī kuchh nahīñ detā ba-juz ġhubār mujhe

ġham-e-hayāt kī jaagī udaas rātoñ meñ

ye aarzū hai kabhī dil se tū pukār mujhe

kisī ke dil ko badal duuñ maiñ kis tarah 'sarvar'

jab apne dil pe nahīñ hai kuchh iḳhtiyār mujhe

sukun nasib hua aur na kuchh qarar mujhe

KHizan hi lagta hai ye mausam-e-bahaar mujhe

wo aaen bazm-e-tasawwur mein bas ye kafi hai

qasam KHuda ki yahi hai visal-e-yar mujhe

ye be-KHudi bhi mohabbat ki ek amanat hai

KHuda ke waste kije na hoshiyar mujhe

samajh sake na mere gham ko aap bhi ab tak

yahi hai gham jo rulata hai zar zar mujhe

ye jaanta hun ki manzil qarib hai lekin

dikhai kuchh nahin deta ba-juz ghubar mujhe

gham-e-hayat ki jagi udas raaton mein

ye aarzu hai kabhi dil se tu pukar mujhe

kisi ke dil ko badal dun main kis tarah 'sarwar'

jab apne dil pe nahin hai kuchh iKHtiyar mujhe