sukut-e-sham-e-KHizan hai qarib aa jao

sukūt-e-shām-e-ḳhizāñ hai qarīb aa jaao

baḌā udaas samāñ hai qarīb aa jaao

na tum ko ḳhud pe bharosa na ham ko zom-e-vafā

na e'tibār-e-jahāñ hai qarīb aa jaao

rah-e-talab meñ kisī ko kisī kā dhyān nahīñ

hujūm-e-ham-safarāñ hai qarīb aa jaao

jo dasht-e-ishq meñ bichhḌe vo umr bhar na mile

yahāñ dhuāñ hī dhuāñ hai qarīb aa jaao

ye āñdhiyāñ haiñ to shahr-e-vafā kī ḳhair nahīñ

zamāna ḳhāk-fishāñ hai qarīb aa jaao

faqīh-e-shahr kī majlis nahīñ ki duur raho

ye bazm-e-pīr-e-muġhāñ hai qarīb aa jaao

'farāz' duur ke sūraj ġhurūb samjhe ga.e

ye daur-e-kam-nazarāñ hai qarīb aa jaao

sukut-e-sham-e-KHizan hai qarib aa jao

baDa udas saman hai qarib aa jao

na tum ko KHud pe bharosa na hum ko zom-e-wafa

na e'tibar-e-jahan hai qarib aa jao

rah-e-talab mein kisi ko kisi ka dhyan nahin

hujum-e-ham-safaran hai qarib aa jao

jo dasht-e-ishq mein bichhDe wo umr bhar na mile

yahan dhuan hi dhuan hai qarib aa jao

ye aandhiyan hain to shahr-e-wafa ki KHair nahin

zamana KHak-fishan hai qarib aa jao

faqih-e-shahr ki majlis nahin ki dur raho

ye bazm-e-pir-e-mughan hai qarib aa jao

'faraaz' dur ke suraj ghurub samjhe gae

ye daur-e-kam-nazaran hai qarib aa jao