sukut-e-sham mein gunji sada udasi ki

sukūt-e-shām meñ gūñjī sadā udāsī kī

ki hai mazīd udāsī davā udāsī kī

bahut sharīr thā maiñ aur hañstā phirtā thā

phir ik faqīr ne de dī duā udāsī kī

umūr-e-dil meñ kisī tīsre kā daḳhl nahīñ

yahāñ faqat tirī chaltī hai yā udāsī kī

charāġh-e-dil ko zarā ehtiyāt se rakhnā

ki aaj raat chalegī havā udāsī kī

vo imtizāj thā aisā ki dañg thī har aañkh

jamāl-e-yār ne pahnī qabā udāsī kī

isī umiid pe āñkheñ barastī rahtī haiñ

ki ek din to sunegā ḳhudā udāsī kī

shajar ne pūchhā ki tujh meñ ye kis kī ḳhushbū hai

havā-e-shām-e-alam ne kahā udāsī kī

dil-e-fasurda ko maiñ ne to maar hī Daalā

so maiñ to Thiik huuñ ab tū sunā udāsī kī

zarā sā chhū leñ to ghanToñ dahaktī rahtī hai

hameñ to maar ga.ī ye adā udāsī kī

bahut dinoñ se maiñ us se nahīñ milā 'fāris'

kahīñ se ḳhair-ḳhabar le ke aa udāsī kī

sukut-e-sham mein gunji sada udasi ki

ki hai mazid udasi dawa udasi ki

bahut sharir tha main aur hansta phirta tha

phir ek faqir ne de di dua udasi ki

umur-e-dil mein kisi tisre ka daKHl nahin

yahan faqat teri chalti hai ya udasi ki

charagh-e-dil ko zara ehtiyat se rakhna

ki aaj raat chalegi hawa udasi ki

wo imtizaj tha aisa ki dang thi har aankh

jamal-e-yar ne pahni qaba udasi ki

isi umid pe aankhen barasti rahti hain

ki ek din to sunega KHuda udasi ki

shajar ne puchha ki tujh mein ye kis ki KHushbu hai

hawa-e-sham-e-alam ne kaha udasi ki

dil-e-fasurda ko main ne to mar hi Dala

so main to Thik hun ab tu suna udasi ki

zara sa chhu len to ghanTon dahakti rahti hai

hamein to mar gai ye ada udasi ki

bahut dinon se main us se nahin mila 'faris'

kahin se KHair-KHabar le ke aa udasi ki