sukut-e-sham se ghabra na jae aaKHir tu

sukūt-e-shām se ghabrā na jaa.e āḳhir tū

mire dayār se guzrī jo ai kiran phir tū

libās-e-jāñ meñ nahīñ sho'lagī kā rang magar

jhulas rahā hai mire saath kyuuñ ba-zāhir tū

vafā-e-vāda-o-paimāñ kā e'tibār bhī kyā

ki maiñ to sāhab-e-īmāñ huuñ aur munkir tū

mire vujūd meñ ik be-zabāñ samundar hai

utar ke dekh safīne se merī ḳhātir tū

maiñ shāḳh-e-sabz nahīñ mahram-e-sabā bhī nahīñ

mire fareb meñ kyuuñ aa gayā hai taa.ir tū

isī umiid pe jalte haiñ rāstoñ meñ charāġh

kabhī to lauT ke aa.egā ai musāfir tū

sukut-e-sham se ghabra na jae aaKHir tu

mere dayar se guzri jo ai kiran phir tu

libas-e-jaan mein nahin sho'lagi ka rang magar

jhulas raha hai mere sath kyun ba-zahir tu

wafa-e-wada-o-paiman ka e'tibar bhi kya

ki main to sahab-e-iman hun aur munkir tu

mere wujud mein ek be-zaban samundar hai

utar ke dekh safine se meri KHatir tu

main shaKH-e-sabz nahin mahram-e-saba bhi nahin

mere fareb mein kyun aa gaya hai tair tu

isi umid pe jalte hain raston mein charagh

kabhi to lauT ke aaega ai musafir tu