sulagti nazron ka KHwab ho tum

sulagtī nazroñ kā ḳhvāb ho tum

mohabbatoñ kā shabāb ho tum

samajh na paa.ī jise kabhī maiñ

kitāb-e-dil kā vo baab ho tum

kaho to juz daan meñ chhupā luuñ

khulī huī ik kitāb ho tum

bichhe the rāhoñ meñ phuul kitne

jo bhā gayā vo gulāb ho tum

burā kahe tum ko laakh duniyā

mire to ālī-janāb ho tum

nahīñ hai bas maiñ tumheñ bhulānā

ajab tarah kā azaab ho tum

lagā ki manzil tumhī ho lekin

nazar kā merī sarāb ho tum

vafā se aarī sahī mizājan

vafā kā merī javāb ho tum

ka.ī savāloñ meñ tum ghire ho

magar bahut lā-javāb ho tum

ulaT ke rakh dī hai merī duniyā

hayāt kā inqalāb ho tum

maiñ raag rañg aur raqs jaisī

ġhazal tarannum rabāb ho tum

ye nashsha TuuTā na zindagī-bhar

bahut purānī sharāb ho tum

ai jaan 'bāno' ye jaan lo ab

ba-zāt-e-ḳhud intiḳhāb ho tum

sulagti nazron ka KHwab ho tum

mohabbaton ka shabab ho tum

samajh na pai jise kabhi main

kitab-e-dil ka wo bab ho tum

kaho to juz dan mein chhupa lun

khuli hui ek kitab ho tum

bichhe the rahon mein phul kitne

jo bha gaya wo gulab ho tum

bura kahe tum ko lakh duniya

mere to aali-janab ho tum

nahin hai bas main tumhein bhulana

ajab tarah ka azab ho tum

laga ki manzil tumhi ho lekin

nazar ka meri sarab ho tum

wafa se aari sahi mizajan

wafa ka meri jawab ho tum

kai sawalon mein tum ghire ho

magar bahut la-jawab ho tum

ulaT ke rakh di hai meri duniya

hayat ka inqalab ho tum

main rag rang aur raqs jaisi

ghazal tarannum rabab ho tum

ye nashsha TuTa na zindagi-bhar

bahut purani sharab ho tum

ai jaan 'bano' ye jaan lo ab

ba-zat-e-KHud intiKHab ho tum