sulagti ret pe aankhen bhi zer-e-pa rakhna

sulagtī ret pe āñkheñ bhī zer-e-pā rakhnā

nahīñ hai sahl havā se muqābla rakhnā

use ye zom ki āġhosh-e-gul bhī us kī hai

jo chāhtā hai parindoñ ko be-navā rakhnā

subuk na ho ye nigah-dāri-e-junūñ ham se

ye dekhne ko use sāmne biThā rakhnā

bikhar na jaanā jarāhat-navāzi-e-shab par

mashām-e-jāñ ko abhī ḳhvāb āshnā rakhnā

vo fursateñ ki jinheñ āhaToñ kī ḳhvāhish ho

unheñ jaras kī tamannā se mā-sivā rakhnā

tamām manzar-e-jāñ us kī ḳhvāhishoñ se banā

vo ḳhvāb hai to use ḳhvāb meñ sajā rakhnā

udāsiyoñ ko to āñgan hī chāhiye ḳhālī

chhatoñ pe chāndnī rātoñ kā silsila rakhnā

vo jab bhī aayā bahut tez bārishoñ jaisā

vo jis ne chāhā mujhe surma.ī ghaTā rakhnā

bas ik charāġh masāfat kā bojh sah legā

suḳhan ke biich talabgāri-e-vafā rakhnā

sulagti ret pe aankhen bhi zer-e-pa rakhna

nahin hai sahl hawa se muqabla rakhna

use ye zom ki aaghosh-e-gul bhi us ki hai

jo chahta hai parindon ko be-nawa rakhna

subuk na ho ye nigah-dari-e-junun hum se

ye dekhne ko use samne biTha rakhna

bikhar na jaana jarahat-nawazi-e-shab par

masham-e-jaan ko abhi KHwab aashna rakhna

wo fursaten ki jinhen aahaTon ki KHwahish ho

unhen jaras ki tamanna se ma-siwa rakhna

tamam manzar-e-jaan us ki KHwahishon se bana

wo KHwab hai to use KHwab mein saja rakhna

udasiyon ko to aangan hi chahiye KHali

chhaton pe chandni raaton ka silsila rakhna

wo jab bhi aaya bahut tez barishon jaisa

wo jis ne chaha mujhe surmai ghaTa rakhna

bas ek charagh masafat ka bojh sah lega

suKHan ke bich talabgari-e-wafa rakhna