sulagti ret pe tahrir jo kahani hai

sulagtī ret pe tahrīr jo kahānī hai

mire junūñ kī ik anmol vo nishānī hai

maiñ apne aap ko tanhā samajh rahā thā magar

sunā hai tum ne bhī sahrā kī ḳhaak chhānī hai

ġhamoñ kī dhuup meñ rahnā hai sā.ebāñ kī tarah

ḳhayāl-e-gesū-e-jānāñ kī mehrbānī hai

kabhī udhar se jo guzregā kārvāñ apnā

to ham bhī dekheñge dariyā meñ kitnā paanī hai

maiñ ab bhī shaan se zinda huuñ shahr-e-qātil meñ

mire ḳhudā kī yaqīnan ye mehrbānī hai

burā na maano to maiñ saaf saaf ye kah duuñ

tumhāre pyaar kā da.avā faqat zabānī hai

añdherā rahtā na baaqī kahīñ magar 'afzal'

kab āñdhiyoñ ne charāġhoñ kī baat maanī hai

sulagti ret pe tahrir jo kahani hai

mere junun ki ek anmol wo nishani hai

main apne aap ko tanha samajh raha tha magar

suna hai tum ne bhi sahra ki KHak chhani hai

ghamon ki dhup mein rahna hai saeban ki tarah

KHayal-e-gesu-e-jaanan ki mehrbani hai

kabhi udhar se jo guzrega karwan apna

to hum bhi dekhenge dariya mein kitna pani hai

main ab bhi shan se zinda hun shahr-e-qatil mein

mere KHuda ki yaqinan ye mehrbani hai

bura na mano to main saf saf ye kah dun

tumhaare pyar ka dawa faqat zabani hai

andhera rahta na baqi kahin magar 'afzal'

kab aandhiyon ne charaghon ki baat mani hai