sun fasl-e-gul KHushi ho gulshan mein aaiyan hain

sun fasl-e-gul ḳhushī ho gulshan meñ ā.iyāñ haiñ

kyā bulbuloñ ne dekho dhūmeñ machāiyāñ haiñ

bīmār ho zamīñ se uThte nahīñ asā bin

nargis ko tum ne shāyad āñkheñ dikhāiyāñ haiñ

dekh us ko aa.ina bhī hairān ho gayā hai

chehre pe jaan tere aisī safā.iyāñ haiñ

ḳhurshīd us ko kahiye to jaan hai vo piilā

gar mah kahūñ tirā muñh to us pe jhā.iyāñ haiñ

yuuñ garm yaar honā phir baat bhī na kahnā

kyā be-muravvatī hai kyā bevafā.iyāñ haiñ

jhamkī dikhā jhijhak kar dil le ke bhaag jaanā

kyā achpalā.iyāñ haiñ kyā chanchalā.iyāñ haiñ

qismat meñ kyā hai dekheñ jiite bacheñ ki mar jaa.eñ

qātil se ab to ham ne āñkheñ laḌā.iyāñ haiñ

dil āshiqoñ kā le kar phir yaar nahīñ ye dilbar

in be-muravvatoñ kī kyā āshnā.iyāñ haiñ

phir mehrbāñ huā hai 'tābāñ' mirā sitamgar

bāteñ tirī kisī ne shāyad sunā.iyāñ haiñ

sun fasl-e-gul KHushi ho gulshan mein aaiyan hain

kya bulbulon ne dekho dhumen machaiyan hain

bimar ho zamin se uThte nahin asa bin

nargis ko tum ne shayad aankhen dikhaiyan hain

dekh us ko aaina bhi hairan ho gaya hai

chehre pe jaan tere aisi safaiyan hain

KHurshid us ko kahiye to jaan hai wo pila

gar mah kahun tera munh to us pe jhaiyan hain

yun garm yar hona phir baat bhi na kahna

kya be-murawwati hai kya bewafaiyan hain

jhamki dikha jhijhak kar dil le ke bhag jaana

kya achpalaiyan hain kya chanchalaiyan hain

qismat mein kya hai dekhen jite bachen ki mar jaen

qatil se ab to hum ne aankhen laDaiyan hain

dil aashiqon ka le kar phir yar nahin ye dilbar

in be-murawwaton ki kya aashnaiyan hain

phir mehrban hua hai 'taban' mera sitamgar

baaten teri kisi ne shayad sunaiyan hain