sun kaha man na manega to pachhtaega

sun kahā maan na mānegā to pachhtā.egā

pyaar nādān ko mat de ki ye mar jā.egā

ravish-e-ām se hoshyār ki pachhtā.egā

vaqt ko chhoḌ ye paanī hai guzar jā.egā

sach koī fan to nahīñ hai jo sikhāyā jaa.e

jhuuT se kaam le sach bolnā aa jā.egā

do pahar hāl-e-ġhanīmat haiñ akele-pan se

saath mat chhoḌ ki āñkhoñ meñ bikhar jā.egā

bahr-e-zulmāt pasīna hai mirī āñkhoñ kā

zid na kar kaam ye aañsū kā bhī kar jā.egā

in lahū-rañg fazāoñ pe na jā baat samajh

ghar ke aaseb se bach vaqt badal jā.egā

merī ġhazleñ haiñ mohabbat ke sahīfe 'anjum'

paḌhne vāloñ ko tilāvat kā mazā aa.egā

sun kaha man na manega to pachhtaega

pyar nadan ko mat de ki ye mar jaega

rawish-e-am se hoshyar ki pachhtaega

waqt ko chhoD ye pani hai guzar jaega

sach koi fan to nahin hai jo sikhaya jae

jhuT se kaam le sach bolna aa jaega

do pahar haal-e-ghanimat hain akele-pan se

sath mat chhoD ki aankhon mein bikhar jaega

bahr-e-zulmat pasina hai meri aankhon ka

zid na kar kaam ye aansu ka bhi kar jaega

in lahu-rang fazaon pe na ja baat samajh

ghar ke aaseb se bach waqt badal jaega

meri ghazlen hain mohabbat ke sahife 'anjum'

paDhne walon ko tilawat ka maza aaega