suna di kis ne rudad-e-gham-e-dil kohsaron ko

sunā dī kis ne rūdād-e-ġham-e-dil kohsāroñ ko

maiñ aksar sochtā huuñ dekh kar in ābshāroñ ko

ga.e mausam kā ik piilā sā pattā shāḳh par rah kar

na jaane kyā batānā chāhtā hai in bahāroñ ko

chale aao na rokegā ġhubār-e-rāh ab tum ko

ki pur-nam kar diyā ashkoñ se maiñ ne rahguzāroñ ko

samajh paa.e haiñ in ko aur na samjheñge ḳhirad vaale

dil-e-āshiq samajh letā hai jin mub.ham ishāroñ ko

ḳhabar-nāme kī surḳhī meñ unhīñ kā zikr thā 'nāzim'

batā.e the jo maiñ ne raaz apne rāz-dāroñ ko

suna di kis ne rudad-e-gham-e-dil kohsaron ko

main aksar sochta hun dekh kar in aabshaaron ko

gae mausam ka ek pila sa patta shaKH par rah kar

na jaane kya batana chahta hai in bahaaron ko

chale aao na rokega ghubar-e-rah ab tum ko

ki pur-nam kar diya ashkon se main ne rahguzaron ko

samajh pae hain in ko aur na samjhenge KHirad wale

dil-e-ashiq samajh leta hai jin mubham ishaaron ko

KHabar-name ki surKHi mein unhin ka zikr tha 'nazim'

batae the jo main ne raaz apne raaz-daron ko