sunahre KHwab aankhon mein buna karte the hum donon

sunahre ḳhvāb āñkhoñ meñ bunā karte the ham donoñ

parindoñ kī tarah din bhar uḌā karte the ham donoñ

ilāhī zindagī yūñhī mohabbat meñ guzar jaa.e

namāz-e-fajr paḌh kar ye duā karte the ham donoñ

hamesha ThanDī ho jaatī thī chaa.e bātoñ bātoñ meñ

vo bāteñ jo in āñkhoñ se kiyā karte the ham donoñ

guzar jaatā thā saarā din ikaTThe sīpiyāñ chunte

samundar ke kināre par rahā karte the ham donoñ

havā ke ek jhoñke se laraz jaate darīchoñ meñ

charāġhoñ kī tarah shab bhar jalā karte the ham donoñ

mohabbat meñ kaThin raste bahut āsān lagte the

pahāḌoñ par suhūlat se chaḌhā karte the ham donoñ

'hasan' rusvā.ī kā ḳhadsha kabhī dil meñ nahīñ aayā

ḳhayāloñ aur ḳhvāboñ meñ milā karte the ham donoñ

sunahre KHwab aankhon mein buna karte the hum donon

parindon ki tarah din bhar uDa karte the hum donon

ilahi zindagi yunhi mohabbat mein guzar jae

namaz-e-fajr paDh kar ye dua karte the hum donon

hamesha ThanDi ho jati thi chae baaton baaton mein

wo baaten jo in aankhon se kiya karte the hum donon

guzar jata tha sara din ikaTThe sipiyan chunte

samundar ke kinare par raha karte the hum donon

hawa ke ek jhonke se laraz jate darichon mein

charaghon ki tarah shab bhar jala karte the hum donon

mohabbat mein kaThin raste bahut aasan lagte the

pahaDon par suhulat se chaDha karte the hum donon

'hasan' ruswai ka KHadsha kabhi dil mein nahin aaya

KHayalon aur KHwabon mein mila karte the hum donon