suno baat uski ulfat ka baDhana isko kahte hain

suno baat us kī ulfat kā baḌhānā is ko kahte haiñ

kahā shab ḳhvāb meñ aa kar ki aanā is ko kahte haiñ

qadam vādī-e-vahshat-nāk-e-ulfat meñ rakhā ham ne

hazār āfāt kā sar par uThānā is ko kahte haiñ

hamārī baat kaaTī ġhair kī tā.īd kī us ne

ghaTānā is ko kahte haiñ baḌhānā is ko kahte haiñ

jo rūThe ham to bole be-dilī se tum ki aa mil jā

idhar ko dekhiyo kyuuñ jī manānā is ko kahte haiñ

dil-e-muztar ke baa.is roz-o-shab rahte haiñ bas larzāñ

dar-o-dīvār-e-ḳhāna tilmilānā is ko kahte haiñ

vo dushman apnā samjhe hai ba-dil maiñ dost huuñ jis kā

kahūñ kyā aur par ulTā zamāna is ko kahte haiñ

ye bole dekh sab tasvīr us kī aur mirī yakjā

parī-rū is ko kahte haiñ divāna is ko kahte haiñ

kiyā hai shefta aalam ko apnā us parī-rū ne

divāna ik jahāñ ko kar dikhānā is ko kahte haiñ

ye chashm-e-gauhar-afshāñ hazrat-e-dil jalva-farmā haiñ

nikal ghar se dar-e-daulat pe aanā is ko kahte haiñ

jo gulshan meñ kisī ne dekh khilnā ġhuncha-e-gul kā

kahā bas aa ke yaañ lazzat uThānā is ko kahte haiñ

tabassum kar ke yuuñ mujh se kahā us shoḳh ne o-be

idhar ko dekh adā se muskurānā is ko kahte haiñ

ġhazal aur is zamīñ meñ paḌhiye vo 'jur.at' ki sun jis ko

kaheñ āshiq kalām-e-āshiqāna is ko kahte haiñ

suno baat us ki ulfat ka baDhana is ko kahte hain

kaha shab KHwab mein aa kar ki aana is ko kahte hain

qadam wadi-e-wahshat-nak-e-ulfat mein rakha hum ne

hazar aafat ka sar par uThana is ko kahte hain

hamari baat kaTi ghair ki taid ki us ne

ghaTana is ko kahte hain baDhana is ko kahte hain

jo ruThe hum to bole be-dili se tum ki aa mil ja

idhar ko dekhiyo kyun ji manana is ko kahte hain

dil-e-muztar ke bais roz-o-shab rahte hain bas larzan

dar-o-diwar-e-KHana tilmilana is ko kahte hain

wo dushman apna samjhe hai ba-dil main dost hun jis ka

kahun kya aur par ulTa zamana is ko kahte hain

ye bole dekh sab taswir us ki aur meri yakja

pari-ru is ko kahte hain diwana is ko kahte hain

kiya hai shefta aalam ko apna us pari-ru ne

diwana ek jahan ko kar dikhana is ko kahte hain

ye chashm-e-gauhar-afshan hazrat-e-dil jalwa-farma hain

nikal ghar se dar-e-daulat pe aana is ko kahte hain

jo gulshan mein kisi ne dekh khilna ghuncha-e-gul ka

kaha bas aa ke yan lazzat uThana is ko kahte hain

tabassum kar ke yun mujh se kaha us shoKH ne o-be

idhar ko dekh ada se muskurana is ko kahte hain

ghazal aur is zamin mein paDhiye wo 'jurat' ki sun jis ko

kahen aashiq kalam-e-ashiqana is ko kahte hain