surKH daman mein shafaq ke koi tara to nahin

surḳh dāman meñ shafaq ke koī taarā to nahīñ

ham ko mustaqbil-e-zarrīñ ne pukārā to nahīñ

dast o pā shal haiñ kināre se lagā baiThā huuñ

lekin is shorish-e-tūfān se haarā to nahīñ

is ġham-e-dost ne kyā kuchh na sitam Dhaa.e magar

ġham-e-daurāñ kī tarah jaan se maarā to nahīñ

dukh bhare gītoñ se māmūr hai kyuuñ barbat-e-jāñ

is meñ kuchh gursana nazroñ kā ishārā to nahīñ

ashk jo de na uThe lau sar-e-mizhgāñ aa kar

sirf ik qatra-e-shabnam hai sharāra to nahīñ

ik ujālā sā jhalaktā hai pas-e-parda-e-shab

chashm-e-be-ḳhvāb meñ larzāñ koī taarā to nahīñ

kitnī ummīdoñ pe jiitā rahā 'vāmiq' ab tak

ab magar ik yahī jiine kā sahārā to nahīñ

surKH daman mein shafaq ke koi tara to nahin

hum ko mustaqbil-e-zarrin ne pukara to nahin

dast o pa shal hain kinare se laga baiTha hun

lekin is shorish-e-tufan se haara to nahin

is gham-e-dost ne kya kuchh na sitam Dhae magar

gham-e-dauran ki tarah jaan se mara to nahin

dukh bhare giton se mamur hai kyun barbat-e-jaan

is mein kuchh gursana nazron ka ishaara to nahin

ashk jo de na uThe lau sar-e-mizhgan aa kar

sirf ek qatra-e-shabnam hai sharara to nahin

ek ujala sa jhalakta hai pas-e-parda-e-shab

chashm-e-be-KHwab mein larzan koi tara to nahin

kitni ummidon pe jita raha 'wamiq' ab tak

ab magar ek yahi jine ka sahaara to nahin