surmai sham hai mausam hai suhana aana

surma.ī shaam hai mausam hai suhānā aanā

is se pahle ki maiñ ho jā.ūñ fasāna aanā

mujh se pahle hī ka.ī log ḳhafā rahte haiñ

mujh se jal jaa.e zarā aur zamāna aanā

ik tirā husn gulāboñ sā ġhazal sūrat hai

ik ye sāvan kā mahīna hai suhānā aanā

roz kahte ho mujhe aaj to ye hai vo hai

aaj duniyā se koī kar ke bahāna aanā

āḳhirī jang maiñ laḌne ke liye niklā huuñ

phir rahe yā na rahe terā divāna aanā

log kahte haiñ tujhe bhuul ke bhī zinda rahūñ

maiñ ne pūchhā thā magar dil nahīñ maanā aanā

log to log haiñ jo chāhe vo kah sakte haiñ

tū to merā hai mire dil ko dukhā nā aanā

tū bhī shamshīr-e-badan mast-adā tīr-e-nigāh

maiñ bhī baiThā huuñ ki ho jā.ūñ nishāna aanā

dushman-e-jān samajhtā hai ki tanhā huuñ maiñ

maiñ ne dushman ko batānā hai ki nā nā aanā

muskurātā huuñ magar Dar hai kisī mahfil meñ

ashk āñkhoñ se na ho jaa.eñ ravāna aanā

vo jo ma.asūm sā shā'ir hai 'mubārak' 'ahmad'

us kā duniyā meñ faqat tū hai ḳhazāna aanā

surmai sham hai mausam hai suhana aana

is se pahle ki main ho jaun fasana aana

mujh se pahle hi kai log KHafa rahte hain

mujh se jal jae zara aur zamana aana

ek tera husn gulabon sa ghazal surat hai

ek ye sawan ka mahina hai suhana aana

roz kahte ho mujhe aaj to ye hai wo hai

aaj duniya se koi kar ke bahana aana

aaKHiri jang main laDne ke liye nikla hun

phir rahe ya na rahe tera diwana aana

log kahte hain tujhe bhul ke bhi zinda rahun

main ne puchha tha magar dil nahin mana aana

log to log hain jo chahe wo kah sakte hain

tu to mera hai mere dil ko dukha na aana

tu bhi shamshir-e-badan mast-ada tir-e-nigah

main bhi baiTha hun ki ho jaun nishana aana

dushman-e-jaan samajhta hai ki tanha hun main

main ne dushman ko batana hai ki na na aana

muskuraata hun magar Dar hai kisi mahfil mein

ashk aankhon se na ho jaen rawana aana

wo jo masum sa sha'ir hai 'mubarak' 'ahmad'

us ka duniya mein faqat tu hai KHazana aana