suraj ki tarah saya-e-diwar mein aaya

sūraj kī tarah sāya-e-dīvār meñ aayā

vo shaḳhs mire halqa-e-me.ār meñ aayā

be-sāḳhta khulte ga.e palkoñ pe sitāre

vo mausam-e-zarḳhez shab-e-tār meñ aayā

kal raat bhī gul-rang huā thā koī bistar

ye zikr na.ī tarah se aḳhbār meñ aayā

ik yaad se Duubī huī har nabz phir ubhrī

Thahrāv sā phir saañs kī raftār meñ aayā

kuchh der jhukī palkoñ ke saa.e meñ rahā phir

vo rang-e-hayā āriz-o-ruḳhsār meñ aayā

jab shahr-e-tamannā kā sukūñ raas na aayā

ghar lauT ke maiñ shiddat-e-afkār meñ aayā

'shahzād' maiñ har ma.arka jab haar ke baiThā

tab josh balā kā dil-e-ḳhuddār meñ aayā

suraj ki tarah saya-e-diwar mein aaya

wo shaKHs mere halqa-e-mear mein aaya

be-saKHta khulte gae palkon pe sitare

wo mausam-e-zarKHez shab-e-tar mein aaya

kal raat bhi gul-rang hua tha koi bistar

ye zikr nai tarah se aKHbar mein aaya

ek yaad se Dubi hui har nabz phir ubhri

Thahraw sa phir sans ki raftar mein aaya

kuchh der jhuki palkon ke sae mein raha phir

wo rang-e-haya aariz-o-ruKHsar mein aaya

jab shahr-e-tamanna ka sukun ras na aaya

ghar lauT ke main shiddat-e-afkar mein aaya

'shahzad' main har marka jab haar ke baiTha

tab josh bala ka dil-e-KHuddar mein aaya