suraj to de diya tha sitara bhi de diya

sūraj to de diyā thā sitāra bhī de diyā

phir ham ne us ko ḳhaak kā ḳhirqa bhī de diyā

aslan to shahr-e-ishq ke me.amār the magar

rab ne dayār-e-dard kā Thekā bhī de diyā

dāman pakaḌ ke pīchhe ye qallāsh thī paḌī

duniyā ko ham ne bhiik kā kaasa bhī de diyā

pagḌī dukān-e-sang-tarāshī kī lī magar

rokan meñ kār-ḳhāna-e-shīsha bhī de diyā

thā hashr ko zamāna-e-mā-qabl-e-hastī kam

so ham ne apnī umr kā arsa bhī de diyā

pahle ukhāḌī ḳhitta-e-dasht-e-junūñ kī baaḌ

phir sar-zamīn-e-ḳhāk kā qabza bhī de diyā

us kī nazar thī haath pe so ham ne is liye

auzār de diye sabhī pesha bhī de diyā

apnī taraf se maiñ ne 'shafaq' ḳhvāb de diye

phir us ke ba.ad aañkh kā surma bhī de diyā

suraj to de diya tha sitara bhi de diya

phir hum ne us ko KHak ka KHirqa bhi de diya

aslan to shahr-e-ishq ke meamar the magar

rab ne dayar-e-dard ka Theka bhi de diya

daman pakaD ke pichhe ye qallash thi paDi

duniya ko hum ne bhik ka kasa bhi de diya

pagDi dukan-e-sang-tarashi ki li magar

rokan mein kar-KHana-e-shisha bhi de diya

tha hashr ko zamana-e-ma-qabl-e-hasti kam

so hum ne apni umr ka arsa bhi de diya

pahle ukhaDi KHitta-e-dasht-e-junun ki baD

phir sar-zamin-e-KHak ka qabza bhi de diya

us ki nazar thi hath pe so hum ne is liye

auzar de diye sabhi pesha bhi de diya

apni taraf se main ne 'shafaq' KHwab de diye

phir us ke baad aankh ka surma bhi de diya