surat-e-haal ab to wo naqsh-e-KHayali ho gaya

sūrat-e-hāl ab to vo naqsh-e-ḳhayālī ho gayā

jo maqām mā-sivā thā dil meñ ḳhālī ho gayā

mumtana.a jo thā vo hai zeb-e-badāhat qalb ko

jo yaqīnī amr thā vo ehtimālī ho gayā

chhoḌī ḳhud-bīnī to ab har shai meñ husn aayā nazar

dīda-e-haq-bīñ jalālī se jamālī ho gayā

zauq-e-nazzāra ye hai āñkhoñ par ab rakhtā huuñ maiñ

zarre zarre ko jo nazar-e-pā.emālī ho gayā

zo.am aur pindār kā haq-ul-yaqīñ se hai badal

vo gharonda ab to fānūs-e-ḳhayālī ho gayā

aañkh uTh kar husn-e-qudrat se jo apne par ga.ī

sab ḳhudī kā rañg rañg-e-infi.ālī ho gayā

pahle is meñ sar thā ai samsām ishq aur jaan thī

kyūñki miltā tujh se aa ab haath ḳhālī ho gayā

ġhairat-e-dil-dāda-o-dil-dār kī jaatī rahī

ab to jo honā thā ai āqā-e-ālī ho gayā

vajah-e-ilm-e-zāt ho kyūñkar na irfān-e-sifat

kyā arz kī shaan jab jauhar se ḳhālī ho gayā

jo rahā ḳhuddār hone par ḳhudī se duur duur

vo dayār-e-ishq o dil-sozī kā vaalī ho gayā

hai ḳhatā us ko agar āshiq kaho tum jis kā ishq

ḳhatm jab us ne murād ik apnī pā lī ho gayā

jazba-e-īsār kyā quvvat amal kī phir kahāñ

jab shu.ūr insāñ kā sarf-e-lā-ubālī ho gayā

ai qadāmat-kesh sun ye ālam-e-ījād hai

naam jiddat kā azal meñ lā-yazālī ho gayā

chhoḌ kar lutf-e-suḳhan maġhz-e-suḳhan se kaam lo

kyā huā 'kaifī' jo garam-e-ḳhush-maqālī ho gayā

surat-e-haal ab to wo naqsh-e-KHayali ho gaya

jo maqam ma-siwa tha dil mein KHali ho gaya

mumtana jo tha wo hai zeb-e-badahat qalb ko

jo yaqini amr tha wo ehtimali ho gaya

chhoDi KHud-bini to ab har shai mein husn aaya nazar

dida-e-haq-bin jalali se jamali ho gaya

zauq-e-nazzara ye hai aankhon par ab rakhta hun main

zarre zarre ko jo nazar-e-paemali ho gaya

zoam aur pindar ka haq-ul-yaqin se hai badal

wo gharonda ab to fanus-e-KHayali ho gaya

aankh uTh kar husn-e-qudrat se jo apne par gai

sab KHudi ka rang rang-e-infiali ho gaya

pahle is mein sar tha ai samsam ishq aur jaan thi

kyunki milta tujh se aa ab hath KHali ho gaya

ghairat-e-dil-dada-o-dil-dar ki jati rahi

ab to jo hona tha ai aaqa-e-ali ho gaya

wajah-e-ilm-e-zat ho kyunkar na irfan-e-sifat

kya arz ki shan jab jauhar se KHali ho gaya

jo raha KHuddar hone par KHudi se dur dur

wo dayar-e-ishq o dil-sozi ka wali ho gaya

hai KHata us ko agar aashiq kaho tum jis ka ishq

KHatm jab us ne murad ek apni pa li ho gaya

jazba-e-isar kya quwwat amal ki phir kahan

jab shuur insan ka sarf-e-la-ubaali ho gaya

ai qadamat-kesh sun ye aalam-e-ijad hai

nam jiddat ka azal mein la-yazali ho gaya

chhoD kar lutf-e-suKHan maghz-e-suKHan se kaam lo

kya hua 'kaifi' jo garam-e-KHush-maqali ho gaya