surat-e-zanjir mauj-e-KHun mein ek aahang hai

sūrat-e-zanjīr mauj-e-ḳhūñ meñ ik āhang hai

āgahī kī had pe ik ḳhvāb-e-junūñ kī jang hai

jaane kin chehroñ kī lau thī jaane kis manzar kī aag

niiñd kā resham dhuāñ hai ḳhvāb sho.ala-rañg hai

ik junūñ-ḳhāne meñ ḳhud ko DhūñDhtā hai aadmī

ḳhud-tavāfī meñ bhī ḳhud se saiñkaḌoñ farsañg hai

kirm-ḳhurda kashtiyāñ bīnā.ī kī haiñ tah-nashīñ

nam havā se ustaḳhvānoñ meñ utartā rang hai

aag ko gulzār kar de us du'ā kā vaqt hai

varna ḳhū-e-ādmiyyat aadmī par tang hai

bū-e-gul ruḳhsat huī shāyad ye ho ḳhatm-e-bahār

TūTtī lai meñ bikhartī saut-e-shab-āhañg hai

ek markaz par zideñ yakjā haiñ aur gardish meñ haiñ

ye zamāne kā taġhayyur 'ālam-e-nairang hai

surat-e-zanjir mauj-e-KHun mein ek aahang hai

aagahi ki had pe ek KHwab-e-junun ki jang hai

jaane kin chehron ki lau thi jaane kis manzar ki aag

nind ka resham dhuan hai KHwab shoala-rang hai

ek junun-KHane mein KHud ko DhunDhta hai aadmi

KHud-tawafi mein bhi KHud se sainkaDon farsang hai

kirm-KHurda kashtiyan binai ki hain tah-nashin

nam hawa se ustaKHwanon mein utarta rang hai

aag ko gulzar kar de us du'a ka waqt hai

warna KHu-e-admiyyat aadmi par tang hai

bu-e-gul ruKHsat hui shayad ye ho KHatm-e-bahaar

TuTti lai mein bikharti saut-e-shab-ahang hai

ek markaz par ziden yakja hain aur gardish mein hain

ye zamane ka taghayyur 'alam-e-nairang hai