surat kisi ki dekhni qismat mein thi kahan

sūrat kisī kī dekhnī qismat meñ thī kahāñ

TuuTā hai merā ā.ina-e-zindagī kahāñ

raushan hayāt hogī na jaane mirī kahāñ

ġham baḳhshtī hai dekhiye chal kar ḳhushī kahāñ

har ek saañs hai jahāñ tauhīn-e-zindagī

ye le kar aa ga.ī hai mujhe zindagī kahāñ

shāyad fareb-e-sāhil-e-duniyā meñ aa ga.ī

ye kashtī-e-hayāt mirī ruk ga.ī kahāñ

kaliyāñ sisak ke rah ga.iiñ gul kasmasā ga.e

tum ne bhī aa ke rokī hai apnī hañsī kahāñ

ai bekasī-e-ishq zarā baḌh ke dekhnā

aage ye mujh se zindagī merī chalī kahāñ

ruktī hai dekho gardish-e-ālam kidhar 'shifā'

letī hai saañs ab ye mirī zindagī kahāñ

surat kisi ki dekhni qismat mein thi kahan

TuTa hai mera aaina-e-zindagi kahan

raushan hayat hogi na jaane meri kahan

gham baKHshti hai dekhiye chal kar KHushi kahan

har ek sans hai jahan tauhin-e-zindagi

ye le kar aa gai hai mujhe zindagi kahan

shayad fareb-e-sahil-e-duniya mein aa gai

ye kashti-e-hayat meri ruk gai kahan

kaliyan sisak ke rah gain gul kasmasa gae

tum ne bhi aa ke roki hai apni hansi kahan

ai bekasi-e-ishq zara baDh ke dekhna

aage ye mujh se zindagi meri chali kahan

rukti hai dekho gardish-e-alam kidhar 'shifa'

leti hai sans ab ye meri zindagi kahan