surat se isko behtar surat nahin hai koi

sūrat se is kī behtar sūrat nahīñ hai koī

dīdār-e-yār sī bhī daulat nahīñ hai koī

āñkhoñ ko khol agar tū dīdār kā hai bhūkā

chaudah tabaq se bāhar ne.amat nahīñ hai koī

sābit tire dahan ko kyā mantiqī kareñge

aisī dalīl aisī hujjat nahīñ hai koī

ye kyā samajh ke kaḌve hote haiñ aap ham se

pī jā.egā kisī ko sharbat nahīñ hai koī

maiñ ne kahā kabhī to tashrīf laao bole

ma.azūr rakhiye vaqt-e-fursat nahīñ hai koī

ham kyā kaheñ kisī se kyā hai tarīq apnā

maz.hab nahīñ hai koī millat nahīñ hai koī

dil le ke jaan ke bhī saa.il jo ho to hāzir

hāzir jo kuchh hai us meñ hujjat nahīñ hai koī

ham shā.eroñ kā halqa halqa hai ārifoñ kā

nā-āshnā-e-ma.anī sūrat nahīñ hai koī

dīvānoñ se hai apne ye qaul us parī kā

ḳhākī o ātishī se nisbat nahīñ hai koī

hazhda hazār aalam dam-bhar rahā hai terā

tujh ko na chāhe aisī ḳhilqat nahīñ hai koī

nāzāñ na husn par ho mehmāñ hai chaar din kā

be-e'tibār aisī daulat nahīñ hai koī

jaañ se aziiz dil ko rakhtā huuñ aadmī huuñ

kyūñ-kar kahūñ maiñ mujh ko hasrat nahīñ hai koī

yuuñ bad kahā karo tum yuuñ maal kuchh na samjho

ham sā bhī ḳhair-ḳhvāh-e-daulat nahīñ hai koī

maiñ pāñch vaqt sajda kartā huuñ is sanam ko

mujh ko bhī aisī-vaisī ḳhidmat nahīñ hai koī

mā-o-shumā kah-o-mah kartā hai zikr terā

is dāstāñ se ḳhālī sohbat nahīñ hai koī

shahr-e-butāñ hai 'ātish' allāh ko karo yaad

kis ko pukārte ho hazrat nahīñ hai koī

surat se is ki behtar surat nahin hai koi

didar-e-yar si bhi daulat nahin hai koi

aankhon ko khol agar tu didar ka hai bhuka

chaudah tabaq se bahar neamat nahin hai koi

sabit tere dahan ko kya mantiqi karenge

aisi dalil aisi hujjat nahin hai koi

ye kya samajh ke kaDwe hote hain aap hum se

pi jaega kisi ko sharbat nahin hai koi

main ne kaha kabhi to tashrif lao bole

mazur rakhiye waqt-e-fursat nahin hai koi

hum kya kahen kisi se kya hai tariq apna

mazhab nahin hai koi millat nahin hai koi

dil le ke jaan ke bhi sail jo ho to hazir

hazir jo kuchh hai us mein hujjat nahin hai koi

hum shaeron ka halqa halqa hai aarifon ka

na-ashna-e-mani surat nahin hai koi

diwanon se hai apne ye qaul us pari ka

KHaki o aatishi se nisbat nahin hai koi

hazhda hazar aalam dam-bhar raha hai tera

tujh ko na chahe aisi KHilqat nahin hai koi

nazan na husn par ho mehman hai chaar din ka

be-e'tibar aisi daulat nahin hai koi

jaan se aziz dil ko rakhta hun aadmi hun

kyun-kar kahun main mujh ko hasrat nahin hai koi

yun bad kaha karo tum yun mal kuchh na samjho

hum sa bhi KHair-KHwah-e-daulat nahin hai koi

main panch waqt sajda karta hun is sanam ko

mujh ko bhi aisi-waisi KHidmat nahin hai koi

ma-o-shuma kah-o-mah karta hai zikr tera

is dastan se KHali sohbat nahin hai koi

shahr-e-butan hai 'atish' allah ko karo yaad

kis ko pukarte ho hazrat nahin hai koi