ta-ba-kai manzil-ba-manzil hum musafir bhagte

tā-ba-kai manzil-ba-manzil ham musāfir bhāgte

aañkh ab Thahrī huī hai aur manāzir bhāgte

ai harīf-e-har-qadam shah-māt se bachne kī soch

is bisāt-e-ḳhāk se kyā ham se shātir bhāgte

ham to aa.e haiñ yahāñ miTne miTāne ke liye

is zamīn-e-karbalā se kis kī ḳhātir bhāgte

bas meñ aa jaane kā jazba bas meñ karne kī havas

ḳhāk-o-bād-o-āb-o-ātish bhī haiñ qāsir bhāgte

sar kahīñ paañv kahīñ āñkheñ kahīñ chehra kahīñ

is havas meñ kho ga.ī pahchān āḳhir bhāgte

'ḳhair' shab-ḳhūñ maar kar chhup jaane vaale ham nahīñ

ma.arka sar karne nikle haiñ to kyā phir bhāgte

khod lete haiñ kuaañ shahdāb pā lete haiñ 'ḳhair'

is zamīn-e-saḳht se kyā ham se shā.ir bhāgte

ta-ba-kai manzil-ba-manzil hum musafir bhagte

aankh ab Thahri hui hai aur manazir bhagte

ai harif-e-har-qadam shah-mat se bachne ki soch

is bisat-e-KHak se kya hum se shatir bhagte

hum to aae hain yahan miTne miTane ke liye

is zamin-e-karbala se kis ki KHatir bhagte

bas mein aa jaane ka jazba bas mein karne ki hawas

KHak-o-baad-o-ab-o-atish bhi hain qasir bhagte

sar kahin panw kahin aankhen kahin chehra kahin

is hawas mein kho gai pahchan aaKHir bhagte

'KHair' shab-KHun mar kar chhup jaane wale hum nahin

marka sar karne nikle hain to kya phir bhagte

khod lete hain kuan shahdab pa lete hain 'KHair'

is zamin-e-saKHt se kya hum se shair bhagte