ta na paDe KHalal kahin aap ke KHwab-e-naz mein

tā na paḌe ḳhalal kahīñ aap ke ḳhvāb-e-nāz meñ

ham nahīñ chāhte kamī apnī shab-e-darāz meñ

aur hī rañg aaj hai āriz-e-gul-azār kā

ḳhūn-e-dil apnā thā magar go na ruḳh-e-tarāz meñ

kyūñki na aadhī aadhī raat jaage vo jis kā dhyān ho

āhu-e-nīm-ḳhvāb meñ nargis-e-nīm-bāz meñ

ḳhusrav-e-aish-e-vasl-e-yār jāñ-kanī aur kohkan

apnā jigar to ḳhuuñ huā ishq ke imtiyāz meñ

bin tire bazm-e-sūr meñ haiñ ye qabāhateñ ki hai

naġhma-e-sūr kā asar naġhma-e-nai-navāz meñ

un se ab iltifāt kī ġhair ko haiñ shikāyateñ

sun ke mirā mubālaġha minnat-e-ehtirāz meñ

kyā sabhī siine jal chuke kyā sabhī dil pighal chuke

bū-e-kabāb ab nahīñ āh-e-jigar-gudāz meñ

parda-nashīñ ke ishq meñ parda-darī na ho kahīñ

hotī haiñ be-hijābiyāñ jān-e-nahufta-rāz meñ

raḳhna-e-dar se ġhair paas dekhā kise ki aaj hai

raḳhna-garī kuchh aur hī nāla-e-raḳhna-sāz meñ

yād-e-butāñ meñ laakh baar fart-e-qalaq se ham bhī to

baiThe uThe haiñ 'momin' aap gir rahe shab namāz meñ

ta na paDe KHalal kahin aap ke KHwab-e-naz mein

hum nahin chahte kami apni shab-e-daraaz mein

aur hi rang aaj hai aariz-e-gul-azar ka

KHun-e-dil apna tha magar go na ruKH-e-taraaz mein

kyunki na aadhi aadhi raat jage wo jis ka dhyan ho

aahu-e-nim-KHwab mein nargis-e-nim-baz mein

KHusraw-e-aish-e-wasl-e-yar jaan-kani aur kohkan

apna jigar to KHun hua ishq ke imtiyaz mein

bin tere bazm-e-sur mein hain ye qabahaten ki hai

naghma-e-sur ka asar naghma-e-nai-nawaz mein

un se ab iltifat ki ghair ko hain shikayaten

sun ke mera mubaalagha minnat-e-ehtiraaz mein

kya sabhi sine jal chuke kya sabhi dil pighal chuke

bu-e-kabab ab nahin aah-e-jigar-gudaz mein

parda-nashin ke ishq mein parda-dari na ho kahin

hoti hain be-hijabiyan jaan-e-nahufta-raaz mein

raKHna-e-dar se ghair pas dekha kise ki aaj hai

raKHna-gari kuchh aur hi nala-e-raKHna-saz mein

yaad-e-butan mein lakh bar fart-e-qalaq se hum bhi to

baiThe uThe hain 'momin' aap gir rahe shab namaz mein