ta-umr aashna na hua dil gunah ka

tā-umr āshnā na huā dil gunāh kā

ḳhāliq bhalā kare tirī tirchhī nigāh kā

tanhā mazā uThātā hai dil rasm-o-rāh kā

biinā to hai pe bas nahīñ chaltā nigāh kā

jī bhar ke dekh luuñ to kar is jurm par shahīd

yuuñ apne sar pe ḳhuun na le be-gunāh kā

ronā jo ho to ro le bas ai chashm vaqt-e-naza.a

ab aaj ḳhātma bhī hai roz-e-siyāh kā

pahuñchā ke ham ko qabr meñ jaate haiñ apne ghar

lījiye unhoñ ne vaada kiyā thā nibāh kā

taqdīr hashr se hameñ laa.ī bahisht meñ

armān dil meñ rah gayā us dād-ḳhvāh kā

pā-posh naaz kartī hai un kī zamīn par

chashmak-zan-e-sip.har hai gosha kulāh kā

dekhā na kārvāñ ne palaT kar ki kaun huuñ

merī tarah na ho koī vāmāñda raah kā

manzil ke qat.a karne kā mohkam huā jo qasd

ik ik daraḳht ḳhizr banā merī raah kā

Dho.e kahāñ tak is tan-e-ḳhākī ko umr bhar

ab ruuh ko mile koī gosha nibāh kā

behtar kahīñ the mujh se vo mai-ḳhvār sāqiyā

hiila jo DhūñDte rahe afu-e-gunāh kā

ashkoñ kā silsila kahīñ TuuTe bhī ai firāq

thak bhī chuke qadam mirī fariyād o aah kā

ik tujh pe munhasir nahīñ ai ḳhizr kar na naaz

har rāh-rau ko taktā hai vāmāñda raah kā

rakkhā jināñ meñ bhī hameñ maġhmūm tā-abad

iqrār ham se le ke hamāre gunāh kā

iz.hār-e-ġham kiyā to ye us ne diyā javāb

chehra gavāhī detā hai jhūTe gavāh kā

ġhauġhā-e-hashr dil meñ samātā nahīñ mire

hañgāma yaad hai mujhe furqat meñ aah kā

bhijvā diyā bahisht meñ pūchhā na dil kā haal

kyā ḳhuub faisla kiyā is dād-ḳhvāh kā

kyā jāniye talāsh-e-asar meñ kahāñ ga.ī

ab tak kahīñ pata na lagā merī aah kā

siine meñ apne naala o shevan kā shor hai

mātam hamesha hai dil-e-ġhufrāñ-panāh kā

yūsuf ko ai sip.har kueñ meñ girā to de

manzūr imtihāñ hai zuleḳhā kī chaah kā

kyūñkar na ahl-e-bazm meñ ai 'shād' ho rusūḳh

nemul-badal huuñ 'rāsiḳh'-e-ġhufrāñ-panāh kā

ta-umr aashna na hua dil gunah ka

KHaliq bhala kare teri tirchhi nigah ka

tanha maza uThata hai dil rasm-o-rah ka

bina to hai pe bas nahin chalta nigah ka

ji bhar ke dekh lun to kar is jurm par shahid

yun apne sar pe KHun na le be-gunah ka

rona jo ho to ro le bas ai chashm waqt-e-naza

ab aaj KHatma bhi hai roz-e-siyah ka

pahuncha ke hum ko qabr mein jate hain apne ghar

lijiye unhon ne wada kiya tha nibah ka

taqdir hashr se hamein lai bahisht mein

arman dil mein rah gaya us dad-KHwah ka

pa-posh naz karti hai un ki zamin par

chashmak-zan-e-siphar hai gosha kulah ka

dekha na karwan ne palaT kar ki kaun hun

meri tarah na ho koi wamanda rah ka

manzil ke qata karne ka mohkam hua jo qasd

ek ek daraKHt KHizr bana meri rah ka

Dhoe kahan tak is tan-e-KHaki ko umr bhar

ab ruh ko mile koi gosha nibah ka

behtar kahin the mujh se wo mai-KHwar saqiya

hila jo DhunDte rahe afu-e-gunah ka

ashkon ka silsila kahin TuTe bhi ai firaq

thak bhi chuke qadam meri fariyaad o aah ka

ek tujh pe munhasir nahin ai KHizr kar na naz

har rah-rau ko takta hai wamanda rah ka

rakkha jinan mein bhi hamein maghmum ta-abad

iqrar hum se le ke hamare gunah ka

izhaar-e-gham kiya to ye us ne diya jawab

chehra gawahi deta hai jhuTe gawah ka

ghaugha-e-hashr dil mein samata nahin mere

hangama yaad hai mujhe furqat mein aah ka

bhijwa diya bahisht mein puchha na dil ka haal

kya KHub faisla kiya is dad-KHwah ka

kya jaaniye talash-e-asar mein kahan gai

ab tak kahin pata na laga meri aah ka

sine mein apne nala o shewan ka shor hai

matam hamesha hai dil-e-ghufran-panah ka

yusuf ko ai siphar kuen mein gira to de

manzur imtihan hai zuleKHa ki chah ka

kyunkar na ahl-e-bazm mein ai 'shad' ho rusuKH

nemul-badal hun 'rasiKH'-e-ghufran-panah ka