tab-e-dil sarf-e-judai ho chuki

tāb-e-dil sarf-e-judā.ī ho chukī

ya.anī tāqat āzmā.ī ho chukī

chhūTtā kab hai asīr-e-ḳhush-zabāñ

jiite jī apnī rihā.ī ho chukī

aage ho masjid ke niklī us kī raah

shaiḳh se ab pārsā.ī ho chukī

darmiyāñ aisā nahīñ ab ā.īna

mere us ke ab safā.ī ho chukī

ek bosa māñgte laḌne lage

itne hī meñ āshnā.ī ho chukī

biich meñ ham hī na hoñ to lutf kyā

rahm kar ab bevafā.ī ho chukī

aaj phir thā be-hamīyat 'mīr' vaañ

kal laḌā.ī sī laḌā.ī ho chukī

tab-e-dil sarf-e-judai ho chuki

yani taqat aazmai ho chuki

chhuTta kab hai asir-e-KHush-zaban

jite ji apni rihai ho chuki

aage ho masjid ke nikli us ki rah

shaiKH se ab parsai ho chuki

darmiyan aisa nahin ab aaina

mere us ke ab safai ho chuki

ek bosa mangte laDne lage

itne hi mein aashnai ho chuki

bich mein hum hi na hon to lutf kya

rahm kar ab bewafai ho chuki

aaj phir tha be-hamiyat 'mir' wan

kal laDai si laDai ho chuki