tab zarre hain agar ho to wahi dil ho jae

taab zarre haiñ agar ho to vahī dil ho jaa.e

aam jalva hai tirā jo mutahammil ho jaa.e

terā har sho.abada ai husn haqīqat Thahre

ham koī naqsh banā leñ to vo bātil ho jaa.e

laakh be-bāk nigāhoñ se nigāheñ laḌ jaa.eñ

ek sahmī sī nazar ho to vo qātil ho jaa.e

Dūbnā shart-e-safar hai mujhe ai shorish-e-bahr

varna girdāb ko duuñ hukm to sāhil ho jaa.e

tujh ko qudrat hai ki har zarre ko ik dil kar de

mujh ko hasrat hai ki jo dil hai mirā dil ho jaa.e

apnī tasvīr-e-majāzī koī rakh do ki kahīñ

kārvān-e-nigah-e-shauq ko manzil ho jaa.e

himmat-e-ishq ki hai husn kī fitrat kā ye raaz

sau ko bismil kare aur ek kā bismil ho jaa.e

aaj tak tak na sake dil koī apne qābil

tum ki patthar ko jo taako to vahī dil ho jaa.e

haif apne safar-e-shauq kī qismat 'rizvī'

paañv thak jaa.eñ jahāñ bas vahīñ manzil ho jaa.e

tab zarre hain agar ho to wahi dil ho jae

aam jalwa hai tera jo mutahammil ho jae

tera har shoabada ai husn haqiqat Thahre

hum koi naqsh bana len to wo baatil ho jae

lakh be-bak nigahon se nigahen laD jaen

ek sahmi si nazar ho to wo qatil ho jae

Dubna shart-e-safar hai mujhe ai shorish-e-bahr

warna girdab ko dun hukm to sahil ho jae

tujh ko qudrat hai ki har zarre ko ek dil kar de

mujh ko hasrat hai ki jo dil hai mera dil ho jae

apni taswir-e-majazi koi rakh do ki kahin

karwan-e-nigah-e-shauq ko manzil ho jae

himmat-e-ishq ki hai husn ki fitrat ka ye raaz

sau ko bismil kare aur ek ka bismil ho jae

aaj tak tak na sake dil koi apne qabil

tum ki patthar ko jo tako to wahi dil ho jae

haif apne safar-e-shauq ki qismat 'rizwi'

panw thak jaen jahan bas wahin manzil ho jae