tak-e-taza par ada-e-taza-tar rakh dijiye

tāk-e-tāza par adā-e-tāza-tar rakh dījiye

kuchh na kuchh baḳhshish sabā ke haath par rakh dījiye

dījiye mat guftugū kī raah us be-rāh ko

an-kahī kī teġh-e-uryāñ par sipar rakh dījiye

kāñpne lagtā hai us lāchār kā niilā badan

shab ke zaanū par agar ghabrā ke sar rakh dījiye

ālam-e-getī kī be-lutfī se ghabrā.e na dil

chāhiye to ik tamāshā.ī digar rakh dījiye

lamha-e-maujūd kā dukh bāñTne ko do ghaḌī

khol kar sab pair se lipTe safar rakh dījiye

kāvish-e-nau dekhiye aur kāsa-e-ummīd meñ

ik nazar aur ek harf-e-mo'tabar rakh dījiye

mū-qalam rakh dījiye paanī kī maujoñ par 'abīr'

āb-jū par ik binā-e-mustaqar rakh dījiye

tak-e-taza par ada-e-taza-tar rakh dijiye

kuchh na kuchh baKHshish saba ke hath par rakh dijiye

dijiye mat guftugu ki rah us be-rah ko

an-kahi ki tegh-e-uryan par sipar rakh dijiye

kanpne lagta hai us lachaar ka nila badan

shab ke zanu par agar ghabra ke sar rakh dijiye

aalam-e-geti ki be-lutfi se ghabrae na dil

chahiye to ek tamashai digar rakh dijiye

lamha-e-maujud ka dukh banTne ko do ghaDi

khol kar sab pair se lipTe safar rakh dijiye

kawish-e-nau dekhiye aur kasa-e-ummid mein

ek nazar aur ek harf-e-mo'tabar rakh dijiye

mu-qalam rakh dijiye pani ki maujon par 'abir'

aab-ju par ek bina-e-mustaqar rakh dijiye