tar ki jhankar hi se bazm tharra jae hai

taar kī jhankār hī se bazm tharrā jaa.e hai

gaahe gaahe sāz-e-hastī yuuñ bhī chheḌā jaa.e hai

qāfila chhūTe zamāna ho gayā lekin hanūz

yād-e-āvāz-e-jaras rah rah ke taḌpā jaa.e hai

ḳhud zamāna ruḳh hamārā dekhtā hai ham nahīñ

jis taraf muḌte haiñ ham dhārā bhī muḌtā jaa.e hai

sar jo gardan par nahīñ to kyā hathelī par sahī

manzil-e-ishq-o-junūñ se yūñhī guzrā jaa.e hai

ham kahāñ Duube the ye kal pūchiyegā aaj to

kuchh talātum sā abhī maujoñ meñ paayā jaa.e hai

aql vaalo kuchh kaho ye rishta-e-rāz-e-hayāt

kyuuñ ulajhtā jaa.e hai jitnā ki khultā jaa.e hai

aa rahā huuñ dosto Thahro magar ye to batāo

mujh ko kis goshe se sahrā ke pukārā jaa.e hai

tar ki jhankar hi se bazm tharra jae hai

gahe gahe saz-e-hasti yun bhi chheDa jae hai

qafila chhuTe zamana ho gaya lekin hanuz

yaad-e-awaz-e-jaras rah rah ke taDpa jae hai

KHud zamana ruKH hamara dekhta hai hum nahin

jis taraf muDte hain hum dhaara bhi muDta jae hai

sar jo gardan par nahin to kya hatheli par sahi

manzil-e-ishq-o-junun se yunhi guzra jae hai

hum kahan Dube the ye kal puchiyega aaj to

kuchh talatum sa abhi maujon mein paya jae hai

aql walo kuchh kaho ye rishta-e-raaz-e-hayat

kyun ulajhta jae hai jitna ki khulta jae hai

aa raha hun dosto Thahro magar ye to batao

mujh ko kis goshe se sahra ke pukara jae hai