tare dard ke jhonke ban kar aate hain

taare dard ke jhoñke ban kar aate haiñ

ham bhī niiñd kī sūrat uḌte jaate haiñ

jab andāz bahāroñ ke yaad aate haiñ

ham kāġhaz par kyā kyā phuul banāte haiñ

vaqt kā patthar bhārī hotā jaatā hai

ham miTTī kī sūrat dete jaate haiñ

kyā zarroñ kā josh sabā ne chhīn liyā

gulshan meñ kyuuñ yaad bagūle aate haiñ

duniyā ne har baat meñ kyā kyā rañg bhare

ham saada aurāq ulaTte jaate haiñ

dil nādāñ hai shāyad raah pe aa jaa.e

tum bhī samjhāo ham bhī samjhāte haiñ

tum bhī ulTī ulTī bāteñ pūchhte ho

ham bhī kaisī kaisī qasmeñ khāte haiñ

baiTh ke ro.eñ kis ko fursat hai 'bāqī'

bhūle-bisre qisse yaad to aate haiñ

tare dard ke jhonke ban kar aate hain

hum bhi nind ki surat uDte jate hain

jab andaz bahaaron ke yaad aate hain

hum kaghaz par kya kya phul banate hain

waqt ka patthar bhaari hota jata hai

hum miTTi ki surat dete jate hain

kya zarron ka josh saba ne chhin liya

gulshan mein kyun yaad bagule aate hain

duniya ne har baat mein kya kya rang bhare

hum sada auraq ulaTte jate hain

dil nadan hai shayad rah pe aa jae

tum bhi samjhao hum bhi samjhate hain

tum bhi ulTi ulTi baaten puchhte ho

hum bhi kaisi kaisi qasmen khate hain

baiTh ke roen kis ko fursat hai 'baqi'

bhule-bisre qisse yaad to aate hain