tare ginte raat kaTti hi nahin aati hai nind

taare ginte raat kaTtī hī nahīñ aatī hai niiñd

dil ko taḌpātā hai hijr āñkhoñ ko tarsātī hai niiñd

ghar meñ āñkhoñ ke qadam rakhne nahīñ paatī hai niiñd

donoñ palkoñ ke tamāñche rāt-bhar khātī hai niiñd

farsh-e-rāhat par mujhe jis vaqt yaad aatā hai yaar

murġh-e-dil aisā phaḌaktā hai ki uḌ jaatī hai niiñd

kaun hai rāhat-rasāñ apnā shab-e-andoh meñ

maut bhī āñkheñ churātī hai jo sharmātī hai niiñd

so.uuñ kyā āñkhoñ kī Dhele ho ga.ī haiñ sañg-e-rāh

aa ke tere ḳhvāb-gah meñ Thokareñ khātī hai niiñd

ain rāhat hai mujhe ḳhidmat-guzārī yaar ke

talve āñkhoñ se jo sahlātā huuñ aa jaatī hai niiñd

din nikal aatā hai uThne ko nahīñ jī chāhtā

saath jab sotā hai vo kyā paañv phailātī hai niiñd

ḳhvāhish-e-dīdār āñkhoñ meñ bharī hai so.uuñ kyā

putliyoñ meñ apnī jā til-bhar nahīñ paatī hai niiñd

murġh-e-bismil āshiq-e-mahjūr dono ek haiñ

us ko phaḌkātī hai marg aur is ko taḌpātī hai niiñd

kaise takiye kaise toshak kaisā hotā hai palañg

maiñ vo ġhāfil huuñ mire ghar aa ke pachhtātī hai niiñd

bhuul jaatā huuñ maiñ ġhaflat meñ ḳhayāl-e-yār ke

badle rāhat kī aziyyat mujh ko pahuñchātī hai niiñd

bāġh-e-jannat ko yūñhī ḳhvāb-e-adam dikhlā.egā

jis tarah kū-e-sanam mujh ko dikhā laatī hai niiñd

jab thake us kī savārī dauḌ kar yuuñ so.e ham

jaise saudāgar ko ghoḌe bech kar aatī hai niiñd

sote sote jab pukār uThtā huuñ apne yaar ko

marqadoñ ke sone vāloñ kī uchaT jaatī hai niiñd

yār-e-gul-andām kā zaanū kahāñ ye sar kahāñ

'bahr' maiñ sotā huuñ mujh ko ḳhvāb dikhlātī hai niiñd

tare ginte raat kaTti hi nahin aati hai nind

dil ko taDpata hai hijr aankhon ko tarsati hai nind

ghar mein aankhon ke qadam rakhne nahin pati hai nind

donon palkon ke tamanche raat-bhar khati hai nind

farsh-e-rahat par mujhe jis waqt yaad aata hai yar

murgh-e-dil aisa phaDakta hai ki uD jati hai nind

kaun hai rahat-rasan apna shab-e-andoh mein

maut bhi aankhen churaati hai jo sharmati hai nind

soun kya aankhon ki Dhele ho gai hain sang-e-rah

aa ke tere KHwab-gah mein Thokaren khati hai nind

ain rahat hai mujhe KHidmat-guzari yar ke

talwe aankhon se jo sahlata hun aa jati hai nind

din nikal aata hai uThne ko nahin ji chahta

sath jab sota hai wo kya panw phailati hai nind

KHwahish-e-didar aankhon mein bhari hai soun kya

putliyon mein apni ja til-bhar nahin pati hai nind

murgh-e-bismil aashiq-e-mahjur dono ek hain

us ko phaDkati hai marg aur is ko taDpati hai nind

kaise takiye kaise toshak kaisa hota hai palang

main wo ghafil hun mere ghar aa ke pachhtati hai nind

bhul jata hun main ghaflat mein KHayal-e-yar ke

badle rahat ki aziyyat mujh ko pahunchati hai nind

bagh-e-jannat ko yunhi KHwab-e-adam dikhlaega

jis tarah ku-e-sanam mujh ko dikha lati hai nind

jab thake us ki sawari dauD kar yun soe hum

jaise saudagar ko ghoDe bech kar aati hai nind

sote sote jab pukar uThta hun apne yar ko

marqadon ke sone walon ki uchaT jati hai nind

yar-e-gul-andam ka zanu kahan ye sar kahan

'bahr' main sota hun mujh ko KHwab dikhlati hai nind