tare jo aasman se gire KHak ho gae

taare jo āsmāñ se gire ḳhaak ho ga.e

zarre uThe to barq-e-ġhazab-nāk ho ga.e

pursān-e-hāl dīda-e-namnāk ho ga.e

ye kab se aap sāhib-e-idrāk ho ga.e

anjām-e-imbisāt-e-chaman ke savāl par

itnā hañse ki phuul jigar-chāk ho ga.e

honā paḌegā qā.el-e-tāmīr-e-ahd-e-nau

jis din ġharīb darḳhur-e-imlāk ho ga.e

taftīsh-e-hāl-e-mausam-e-gul ko chale haiñ aap

ab jab ki āshiyāñ ḳhas-o-ḳhāshāk ho ga.e

saada diloñ ne rāhnumāyān-e-qaum se

itne fareb khaa.e ki chālāk ho ga.e

dah zehn vo dimāġh jo aa.e vatan ke kaam

nazr-e-nashāt-e-bāda-o-tiryāk ho ga.e

chhūTā na ham se dāman-e-tahzīb-e-anjuman

dushman zarā sī Dhiil pe be-bāk ho ga.e

taslīm kar na paa.e jinheñ ḳhāksār ham

vo aap kī balā se agar ḳhaak ho ga.e

sar par chaḌhā liyā hai jinheñ aaj aap ne

kal dekh leñge aap ḳhatarnāk ho ga.e

ham bhī imām-e-masjid-e-jāma kī tarah 'shād'

dho.e ga.e kuchh aise ki bas paak ho ga.e

tare jo aasman se gire KHak ho gae

zarre uThe to barq-e-ghazab-nak ho gae

pursan-e-haal dida-e-namnak ho gae

ye kab se aap sahib-e-idrak ho gae

anjam-e-imbisat-e-chaman ke sawal par

itna hanse ki phul jigar-chaak ho gae

hona paDega qael-e-tamir-e-ahd-e-nau

jis din gharib darKHur-e-imlak ho gae

taftish-e-haal-e-mausam-e-gul ko chale hain aap

ab jab ki aashiyan KHas-o-KHashak ho gae

sada dilon ne rahnumayan-e-qaum se

itne fareb khae ki chaalak ho gae

dah zehn wo dimagh jo aae watan ke kaam

nazr-e-nashat-e-baada-o-tiryak ho gae

chhuTa na hum se daman-e-tahzib-e-anjuman

dushman zara si Dhil pe be-bak ho gae

taslim kar na pae jinhen KHaksar hum

wo aap ki bala se agar KHak ho gae

sar par chaDha liya hai jinhen aaj aap ne

kal dekh lenge aap KHatarnak ho gae

hum bhi imam-e-masjid-e-jama ki tarah 'shad'

dhoe gae kuchh aise ki bas pak ho gae