tasir-e-barq-e-husn jo un ke suKHan mein thi

tāsīr-e-barq-e-husn jo un ke suḳhan meñ thī

ik larzish-e-ḳhafī mire saare badan meñ thī

vaañ se nikal ke phir na farāġhat huī nasīb

āsūdgī kī jaan tirī anjuman meñ thī

ik rañg-e-iltifāt bhī us be-ruḳhī meñ thā

ik sādgī bhī us nigah-e-sahar fan meñ thī

mohtāj-e-bū-e-itr na thā jism-e-ḳhūb-e-yār

ḳhushbu-e-dilbarī thī jo us pairahan meñ thī

kuchh dil hī bujh gayā hai mirā varna aaj kal

kaifiyat-e-bahār kī shiddat chaman meñ thī

mālūm ho ga.ī mire dil ko rāh-e-shauq

vo baat pyaar kī jo hunūz us dahan meñ thī

ġhurbat kī sub.h meñ bhī nahīñ hai vo raushnī

jo raushnī ki shām-e-savād-e-vatan meñ thī

aish gudāz-e-dil bhī ġham-e-āshiqī meñ thā

ik rāhat-e-latīf bhī zimn-e-mehan meñ thī

achchhā huā ki ḳhātir-e-'hasrat' se haT ga.ī

haibat sī ik jo ḳhatra-e-dār-o-rasan meñ thī

tasir-e-barq-e-husn jo un ke suKHan mein thi

ek larzish-e-KHafi mere sare badan mein thi

wan se nikal ke phir na faraghat hui nasib

aasudgi ki jaan teri anjuman mein thi

ek rang-e-iltifat bhi us be-ruKHi mein tha

ek sadgi bhi us nigah-e-sahar fan mein thi

mohtaj-e-bu-e-itr na tha jism-e-KHub-e-yar

KHushbu-e-dilbari thi jo us pairahan mein thi

kuchh dil hi bujh gaya hai mera warna aaj kal

kaifiyat-e-bahaar ki shiddat chaman mein thi

malum ho gai mere dil ko rah-e-shauq

wo baat pyar ki jo hunuz us dahan mein thi

ghurbat ki subh mein bhi nahin hai wo raushni

jo raushni ki sham-e-sawad-e-watan mein thi

aish gudaz-e-dil bhi gham-e-ashiqi mein tha

ek rahat-e-latif bhi zimn-e-mehan mein thi

achchha hua ki KHatir-e-'hasrat' se haT gai

haibat si ek jo KHatra-e-dar-o-rasan mein thi