tayyun tasalsul hai naqsh-e-badan ka

ta.ayyun tasalsul hai naqsh-e-badan kā

usī se ta.alluq hai ye jān-o-tan kā

tasavvuf tabaddul hai ādāt-e-bad kā

ta.arruf natīja hai ḳhulq-e-hasan kā

vahī gul shajar hai vahī bostāñ hai

vahī aap hai bāġhbāñ is chaman kā

vo be-kaif-o-kam hai qadīm-o-azal se

usī se hai ye naqsh-e-dahr-e-kuhan kā

tavallā samajh ham-zabānī se behtar

ta.ashshuq huā ham-dam-o-ham-suḳhan kā

ram-o-shauq kī bhī ajā.ib kashish hai

burā haal hai āshiq-e-ḳhasta-tan kā

jo sirr-e-ḳhafī hai vo ain-e-jalī hai

khulā aaj uqda ye sirr-e-dahan kā

latāif meñ muzmar hai tasvīr-e-vahdat

ye ḳhalvat meñ paidā hai lutf anjuman kā

nazar bar-qadam hai tarīq-e-tasavvur

ram-o-shauq jaada hai sirr-o-elan kā

nihāñ se ayaañ hai ayaañ meñ nihāñ hai

ye jaada milā hai safar dar-vatan kā

sulūk-e-tarīqat hai āfāq-o-anfus

ki jalva hai tanzīh meñ sīm-tan kā

vo be-parda bhī parda-posh-e-nazar hai

hijāb aa gayā hai hameñ husn-e-zan kā

kabhī shād-o-ḳhandāñ kabhī zār-o-nālāñ

tamāshā hai 'sāqī' ke dīvāna-pan kā

tayyun tasalsul hai naqsh-e-badan ka

usi se talluq hai ye jaan-o-tan ka

tasawwuf tabaddul hai aadat-e-bad ka

tarruf natija hai KHulq-e-hasan ka

wahi gul shajar hai wahi bostan hai

wahi aap hai baghban is chaman ka

wo be-kaif-o-kam hai qadim-o-azal se

usi se hai ye naqsh-e-dahr-e-kuhan ka

tawalla samajh ham-zabani se behtar

tashshuq hua ham-dam-o-ham-suKHan ka

ram-o-shauq ki bhi ajaib kashish hai

bura haal hai aashiq-e-KHasta-tan ka

jo sirr-e-KHafi hai wo ain-e-jali hai

khula aaj uqda ye sirr-e-dahan ka

lataif mein muzmar hai taswir-e-wahdat

ye KHalwat mein paida hai lutf anjuman ka

nazar bar-qadam hai tariq-e-tasawwur

ram-o-shauq jada hai sirr-o-elan ka

nihan se ayan hai ayan mein nihan hai

ye jada mila hai safar dar-watan ka

suluk-e-tariqat hai aafaq-o-anfus

ki jalwa hai tanzih mein sim-tan ka

wo be-parda bhi parda-posh-e-nazar hai

hijab aa gaya hai hamein husn-e-zan ka

kabhi shad-o-KHandan kabhi zar-o-nalan

tamasha hai 'saqi' ke diwana-pan ka