taza-dam pur-azm shoala-bar din

tāza-dam pur-azm sho.ala-bār din

shaam ko sābit huā be-kār din

zard kirneñ sard jhoñke gard ham

kis tarah kāTeñ ye shab-āsār din

sub.h ko rahte haiñ ham fālij-zada

raat ko miltā nahīñ ayyār din

bhuuk le kar ḳhvān meñ aa.ī hai shaam

aa.egā kal tishnagī-bardār din

umr ya.anī laash kā lambā safar

zindagī kī umr bas do-chār din

raat hī ko chal diyā vo qāfila

ab kurede raakh kā ambār din

kis binā par koī samjhauta kareñ

tum numūd-e-shab mirā iz.hār din

āp-bītī kyā likhūñ kyūñkar likhūñ

haiñ kahāñ kuchh qābil-e-iz.hār din

raat bhar is soch meñ jaagā kiye

ab kahāñ kāTeñge ik be-kār din

taza-dam pur-azm shoala-bar din

sham ko sabit hua be-kar din

zard kirnen sard jhonke gard hum

kis tarah kaTen ye shab-asar din

subh ko rahte hain hum falij-zada

raat ko milta nahin ayyar din

bhuk le kar KHwan mein aai hai sham

aaega kal tishnagi-bardar din

umr yani lash ka lamba safar

zindagi ki umr bas do-chaar din

raat hi ko chal diya wo qafila

ab kurede rakh ka ambar din

kis bina par koi samjhauta karen

tum numud-e-shab mera izhaar din

aap-biti kya likhun kyunkar likhun

hain kahan kuchh qabil-e-izhaar din

raat bhar is soch mein jaga kiye

ab kahan kaTenge ek be-kar din