taza hawa bahaar ki dil ka malal le gai

taaza havā bahār kī dil kā malāl le ga.ī

pā-e-junūñ se halqa-e-gardish-e-hāl le ga.ī

jur.at-e-shauq ke sivā ḳhalvatiyān-e-ḳhās ko

ik tire ġham kī āgahī tā-ba-savāl le ga.ī

shola-e-dil bujhā bujhā ḳhāk-e-zabāñ uḌī uḌī

dasht-e-hazār-dām se mauj-e-ḳhayāl le ga.ī

raat kī raat bū-e-gul kūza-e-gul meñ bas ga.ī

rañg-e-hazār mai-kada rūh-e-sifāl le ga.ī

tez havā kī chaap se tīra-banoñ meñ lau uThī

rūh-e-taġhayyur-e-jahāñ aag se faal le ga.ī

nāfa-e-āhu-e-tatār zaḳhm-e-numūd kā shikār

dasht se zindagī kī rau ek misāl le ga.ī

hijr o visāl o nek o bad gardish-e-sad-hazār-o-sad

tujh ko kahāñ kahāñ mire sarv-e-kamāl le ga.ī

narm havā pe yuuñ khule kuchh tire pairahan ke raaz

sab tire jism-e-nāz ke rāz-e-visāl le ga.ī

mātam-e-marg-e-qais kī kis se banegī dāstāñ

nauha-e-be-zabāñ koī chashm-e-ġhazāl le ga.ī

taza hawa bahaar ki dil ka malal le gai

pa-e-junun se halqa-e-gardish-e-haal le gai

jurat-e-shauq ke siwa KHalwatiyan-e-KHas ko

ek tere gham ki aagahi ta-ba-sawal le gai

shola-e-dil bujha bujha KHak-e-zaban uDi uDi

dasht-e-hazar-dam se mauj-e-KHayal le gai

raat ki raat bu-e-gul kuza-e-gul mein bas gai

rang-e-hazar mai-kada ruh-e-sifal le gai

tez hawa ki chap se tira-banon mein lau uThi

ruh-e-taghayyur-e-jahan aag se fal le gai

nafa-e-ahu-e-tatar zaKHm-e-numud ka shikar

dasht se zindagi ki rau ek misal le gai

hijr o visal o nek o bad gardish-e-sad-hazar-o-sad

tujh ko kahan kahan mere sarw-e-kamal le gai

narm hawa pe yun khule kuchh tere pairahan ke raaz

sab tere jism-e-naz ke raaz-e-visal le gai

matam-e-marg-e-qais ki kis se banegi dastan

nauha-e-be-zaban koi chashm-e-ghazal le gai