taza mohabbaton ka nasha jism-o-jaan mein hai

taaza mohabbatoñ kā nasha jism-o-jāñ meñ hai

phir mausam-e-bahār mire gulsitāñ meñ hai

ik ḳhvāb hai ki bār-e-digar dekhte haiñ ham

ik āshnā sī raushnī saare makāñ meñ hai

tābish meñ apnī mahr-o-mah-o-najm se sivā

jugnū sī ye zamīñ jo kaf-e-āsmāñ meñ hai

ik shāḳh-e-yāsmīn thī kal tak ḳhizāñ-asar

aur aaj saarā baaġh usī kī amaañ meñ hai

ḳhushbū ko tark kar ke na laa.e chaman meñ rañg

itnī to sūjh-būjh mire bāġhbāñ meñ hai

lashkar kī aañkh māl-e-ġhanīmat pe hai lagī

sālār-e-fauj aur kisī imtihāñ meñ hai

har jāñ-nisār yād-dahānī meñ munhamik

nekī kā har hisāb dil-e-dostāñ meñ hai

hairat se dekhtā hai samundar mirī taraf

kashtī meñ koī baat hai yā bādbāñ meñ hai

taza mohabbaton ka nasha jism-o-jaan mein hai

phir mausam-e-bahaar mere gulsitan mein hai

ek KHwab hai ki bar-e-digar dekhte hain hum

ek aashna si raushni sare makan mein hai

tabish mein apni mahr-o-mah-o-najm se siwa

jugnu si ye zamin jo kaf-e-asman mein hai

ek shaKH-e-yasmin thi kal tak KHizan-asar

aur aaj sara bagh usi ki aman mein hai

KHushbu ko tark kar ke na lae chaman mein rang

itni to sujh-bujh mere baghban mein hai

lashkar ki aankh mal-e-ghanimat pe hai lagi

salar-e-fauj aur kisi imtihan mein hai

har jaan-nisar yaad-dahani mein munhamik

neki ka har hisab dil-e-dostan mein hai

hairat se dekhta hai samundar meri taraf

kashti mein koi baat hai ya baadban mein hai