tabdili-e-mahaul to dushwar nahin hai

tabdīlī-e-māhaul to dushvār nahīñ hai

lekin dil-e-insāñ abhī bedār nahīñ hai

sahbā-e-mohabbat se jo sarshār nahīñ hai

kuchh aur use kahiye vo mai-ḳhvār nahīñ hai

ai dast-e-junūñ ab to sukūñ mil gayā tujh ko

ab to mire dāman meñ koī taar nahīñ hai

kuchh der zarā aur Thahar ai ġham-e-jānāñ

tū hai to ġham-e-zīst girāñ-bār nahīñ hai

dil anjuman-e-‘aish se bezār hai lekin

duniyā-e-ġham-e-'ishq se bezār nahīñ hai

Dartā huuñ ki ye rasm kahīñ 'aam na ho jaa.e

varna mujhe ḳhauf-e-rasan-o-dār nahīñ hai

in mast nigāhoñ se jo piitā hai vo mai-ḳhvār

saaqī kī tavajjoh kā talabgār nahīñ hai

ham aur ġham-e-'ishq kā shikva are tauba

arbāb-e-mohabbat kā ye me'yār nahīñ hai

jām-e-mai-e-‘irfāñ kā talabgār hai 'ārif'

jām-e-mai-e-rañgīñ kā parastār nahīñ hai

tabdili-e-mahaul to dushwar nahin hai

lekin dil-e-insan abhi bedar nahin hai

sahba-e-mohabbat se jo sarshaar nahin hai

kuchh aur use kahiye wo mai-KHwar nahin hai

ai dast-e-junun ab to sukun mil gaya tujh ko

ab to mere daman mein koi tar nahin hai

kuchh der zara aur Thahar ai gham-e-jaanan

tu hai to gham-e-zist giran-bar nahin hai

dil anjuman-e-‘aish se bezar hai lekin

duniya-e-gham-e-'ishq se bezar nahin hai

Darta hun ki ye rasm kahin 'am na ho jae

warna mujhe KHauf-e-rasan-o-dar nahin hai

in mast nigahon se jo pita hai wo mai-KHwar

saqi ki tawajjoh ka talabgar nahin hai

hum aur gham-e-'ishq ka shikwa are tauba

arbab-e-mohabbat ka ye me'yar nahin hai

jam-e-mai-e-‘irfan ka talabgar hai 'arif'

jam-e-mai-e-rangin ka parastar nahin hai