tabdiliyon ki rah pe chalne to de mujhe

tabdīliyoñ kī raah pe chalne to de mujhe

ḳhud ko badal rahā huuñ badalne to de mujhe

bachcha nahīñ huuñ maiñ jo bhaTak jā.ūñgā kahīñ

tanhā rah-e-hayāt meñ chalne to de mujhe

jaltā huā charāġh agar hai mirā vajūd

phir apne dil ke taaq meñ jalne to de mujhe

gar merī dastaras meñ nahīñ āsmāñ kā chāñd

mahtāb-sūratoñ se bahalne to de mujhe

ban jā.ūñgā kiran tirī sub.h-e-jamāl kī

tū apne rañg ruup meñ Dhalne to de mujhe

bār-e-ġham-e-hayāt uThā lūñgā aur bhī

ai inqilāb-e-dahr sambhalne to de mujhe

dam toḌ deñgī ḳhud hī purānī rivāyateñ

ā.īn-e-mulk-e-shauq badalne to de mujhe

mil jā.egā mujhe bhī ujāloñ kā rāsta

zindān-e-tīrgī se nikalne to de mujhe

tabdiliyon ki rah pe chalne to de mujhe

KHud ko badal raha hun badalne to de mujhe

bachcha nahin hun main jo bhaTak jaunga kahin

tanha rah-e-hayat mein chalne to de mujhe

jalta hua charagh agar hai mera wajud

phir apne dil ke taq mein jalne to de mujhe

gar meri dastaras mein nahin aasman ka chand

mahtab-suraton se bahalne to de mujhe

ban jaunga kiran teri subh-e-jamal ki

tu apne rang rup mein Dhalne to de mujhe

bar-e-gham-e-hayat uTha lunga aur bhi

ai inqilab-e-dahr sambhalne to de mujhe

dam toD dengi KHud hi purani riwayaten

aain-e-mulk-e-shauq badalne to de mujhe

mil jaega mujhe bhi ujalon ka rasta

zindan-e-tirgi se nikalne to de mujhe