taDap se chiKH uTThega jo use KHun-Khaar kah denge

taḌap se chīḳh uTThegā jo use ḳhūñ-ḳhār kah deñge

kahegā āp-bītī jo use bīmār kah deñge

ye aalam hai ki gar kuchh bhī kahā in aql vāloñ se

to ye us meñ milā kar aur bhī do-chār kah deñge

vo rahte haiñ jahāñ par jānte haiñ ye jahannum hai

magar bechāre ġham ke maare sab finnār kah deñge

gar un se pūchhā jaa.e aap ne āḳhir kiyā hī kyā

khaḌī kar aaTh das īñTeñ use mīnār kah deñge

bavanDar se makāñ gar gir ga.e mere adūoñ ke

to ye tānūr ko bhī merā janib-dār kah deñge

rahā jo phūloñ se parde haTāne kī himāyat meñ

usī ġham-ḳhvār ko sab tālib-e-dīdār kah deñge

badalte daur meñ ik khel dekhegā madārī bhī

rakhā jo jeb meñ hogā use dīnār kah deñge

mire hāthoñ banegā jo bhī vo be-kār hī hogā

musavvir kī har ik tasvīr ko shahkār kah deñge

hunar ab siikh lo 'jhālā' kahīñ se ġham-nigārī kā

yahāñ sab dil jale hī haiñ tumheñ fankār kah deñge

taDap se chiKH uTThega jo use KHun-KHar kah denge

kahega aap-biti jo use bimar kah denge

ye aalam hai ki gar kuchh bhi kaha in aql walon se

to ye us mein mila kar aur bhi do-chaar kah denge

wo rahte hain jahan par jaante hain ye jahannum hai

magar bechaare gham ke mare sab finnar kah denge

gar un se puchha jae aap ne aaKHir kiya hi kya

khaDi kar aaTh das inTen use minar kah denge

bawanDar se makan gar gir gae mere aduon ke

to ye tanur ko bhi mera janib-dar kah denge

raha jo phulon se parde haTane ki himayat mein

usi gham-KHwar ko sab talib-e-didar kah denge

badalte daur mein ek khel dekhega madari bhi

rakha jo jeb mein hoga use dinar kah denge

mere hathon banega jo bhi wo be-kar hi hoga

musawwir ki har ek taswir ko shahkar kah denge

hunar ab sikh lo 'jhaala' kahin se gham-nigari ka

yahan sab dil jale hi hain tumhein fankar kah denge